The news is by your side.

Advertisement

پالتو جانور کے مرنے پر تنخواہ کے ساتھ 2 دن کی چھٹی

بوگوٹا: جنوبی امریکی ملک کولمبیا میں پالتو جانور کے مرنے پر مالک کو چھٹی دینے کا قانون اسمبلی میں لایا گیا ہے۔

تفصیلات کے مطابق کولمبین اسمبلی کے ایک رکن نے بل پیش کیا ہے کہ پالتو جانور کی موت کا غم منانے کے لیے جانور کے مالک کو تنخواہ کے ساتھ 2 دن کی چھٹی دینے کا قانون پاس کر کے کمپنیوں کو چھٹی دینے کے لیے پابند کیا جائے۔

کولمبین لبرل پارٹی کے رکن کا کہنا تھا کہ اس نئے قانون کا مقصد پالتو جانوروں اور مالکان کے درمیان جذباتی تعلق کا اعتراف کرنا ہے، کیوں کہ پالتو جانوروں کے مرنے سے انسان گہرے دکھ اور افسوس کا شکار ہو جاتا ہے۔

رکن اسمبلی کا مؤقف تھا کہ بعض لوگوں کے بچے نہیں ہوتے بلکہ ان کے پالتو جانور ہی ان کی یہ کمی پوری کرتے ہیں، جن سے وہ اپنی فیملی کی طرح محبت کرتے ہیں، جب ان کے جانور کا انتقال ہوتا ہے تو انھیں چھٹی ملنے کا پورا حق ہے، تاکہ وہ سکون سے اس صدمے سے باہر نکل سکیں۔

بل میں یہ شق بھی شامل کی گئی ہے کہ ملازمین کو نوکری کرتے وقت مالکان کو پہلے سے اپنے پالتو جانوروں کے بارے میں آگاہ کرنا ہوگا، جب کہ چھٹی کے لیے اپنے پالتو جانور کی موت کے بارے میں جھوٹ بولنے پر انھیں سزا بھی ہو سکتی ہے۔

رپورٹ کے مطابق کولمبیا میں ہر 10 میں سے 6 گھرانے پالتو جانور رکھتے ہیں۔

Comments

یہ بھی پڑھیں