کراچی : شرافی گوٹھ تھانے میں2 ڈی ایس پی،3ایس ایچ اوز سمیت15اہلکاروں کیخلاف ایف آئی آر درج کرلی گئی، ملزمام پر الزام ہے کہ انہوں نے ایک وکیل کو حبس بے جا میں رکھا۔
تفصیلات کے مطابق وکیل کو حبس بے جا میں رکھنے کے الزام میں2 ڈی ایس پی،3ایس ایچ اوز سمیت15اہلکاروں کیخلاف مقدمہ درج کرلیا گیا، شرافی گوٹھ پولیس نے مقدمہ امان اللہ ایڈووکیٹ کی مدعیت میں درج کیا۔
اس حوالے سے پولیس ذرائع کے مطابق ایف آئی آر میں کہا گیا ہے کہ ڈسٹرکٹ ساؤتھ پولیس افسران نے ایڈووکیٹ امان اللہ کو حبس بیجا میں رکھا۔
دوسری جانب ڈسٹرکٹ ساؤتھ پولیس کا کہنا ہے کہ ایڈووکیٹ امان اللہ کی جگہ سے جرائم پیشہ ملزم کو گرفتار کیا گیا تھا، جس ملزم کو گرفتار کیا گیا وہ کئی مقدمات میں مفرور تھا، امان اللہ نے سرکاری کام میں مداخلت کی جس کی وجہ سے مقدمہ درج کیا گیا تھا۔
علاوہ ازیں کراچی میں جرائم کا جن روز بروز بے قابو ہوتا جارہا ہے، لوگ دن دہاڑے اپنے قیمتی سامان اور نقدی سے محروم کردئیے جاتے ہیں لیکن پولیس ان افراد کو گرفتار کرنے میں ناکام نظر آتی ہے۔
کراچی کے علاقے نارتھ ناظم آباد میں گزشتہ روز2موٹرسائیکل سوار ملزمان نے گھر کے باہر کھڑے شہری سے لوٹ مار کی اور باآسانی فرار ہوگئے واردات کی سی سی ٹی وی فوٹیج منظر عام پر آگئی، ملزمان نے شہری کو موبائل فون اور رقم سے محروم کردیا۔
