دبئی: متحدہ عرب امارات کے اینالاگ مشن 1 کے لیے پہلے دو اماراتی خلابازوں کے ناموں کا اعلان کر دیا گیا۔
عرب میڈیا کے مطابق محمد بن راشد خلائی مرکز (ایم بی آر ایس سی) نے متحدہ عرب امارات کے اینالاگ مشن 1 کے لیے پہلے اماراتی اینالاگ خلا بازوں عبد اللہ الحمادی اور صالح العامری کا انتخاب کیا ہے۔
یہ امیدوار مشن کی کریو ون ٹیم کا حصہ ہوں گے، اس مشن میں تنہائی اور ایک جگہ محدود رہنے کے انسانی نفسیات، فزیالوجی اور ٹیم کی حرکیات پر اثرات کا مطالعہ کیا جائے گا، تاکہ طویل عرصے تک خلائی تحقیق کی تیاری میں مدد مل سکے۔
اماراتی اینالاگ خلا باز رواں سال کے آخر میں روسی دارالحکومت ماسکو میں این ای کے گراؤنڈ بیسڈ اینالاگ مرکز میں ہونے والے 8 ماہ دورانیے کی یونیک ٹیرسٹریئل اسٹیشن (ایس آئی آر آئی یو ایس) کی بین الاقوامی تحقیق کا حصہ ہوں گے۔
عبداللہ الحمادی نے مانچسٹر میٹروپولیٹن سے ایرو اسپیس انجینئرنگ میں فاؤنڈیشن کی ڈگری اور ابوظبی یونیورسٹی سے مکینیکل انجینئرنگ میں بیچلر کی ڈگری حاصل کی ہے، وہ گزشتہ 17 برسوں سے متحدہ عرب امارات کی مسلح افواج کا حصہ اور اس وقت بحالی شعبے کے عملے کے سربراہ ہیں۔
.@MBRSpaceCentre announces names of first two Emiratis selected for UAE Analog Mission#1 as part of the Scientific International Research in Unique Terrestrial Station (SIRIUS) SIRIUS 20/21, an 8-month analog mission that will be conducted in Moscow, Russia later this year. pic.twitter.com/4xAeCimysv
— Dubai Media Office (@DXBMediaOffice) August 15, 2021
صالح العامری نے خلیفہ یونیورسٹی سے مکینیکل انجینئرنگ میں بیچلر کی ڈگری حاصل کی ہے، وہ موبیئس انسٹیٹیوٹ کے کمپین تجزیہ کار ہیں، العامری فی الحال ادنوک میں مکینیکل انجینئر کے طور پرکام کر رہے ہیں، ان کی ٹیم نے ابوظبی سولر چیلنج 2015 میں دوسری پوزیشن حاصل کی تھی۔
ایم بی آر ایس سی کے ڈائریکٹر جنرل يوسف حمد الشيبانی کا کہنا تھا کہ ہم متحدہ عرب امارات میں خلائی تحقیق کے ایک نئے دور میں داخل ہو رہے ہیں، نالج بیسڈ اکانومی کو فروغ دینے کے لیے خلائی شعبے میں سرمایہ کاری جاری رکھی جائے گی۔
