لکھنؤ: بھارتی ریاست اترپردیش میں عجیب الخلقت بچھڑے کی پیدائش ہوئی ہے جس کی تصاویر سوشل میڈیا پر وائرل ہوگئیں۔
بھارتی میڈیا کے مطابق ریاست اترپردیش کے ضلع چندولی میں عجیب الخلقت بچھڑے کی پیدائش ہوئی جس کے دو سر، دو منہ، دو کان اور چار آنکھیں ہیں۔
بچھڑا گزشتہ دنوں اروند یادو نامی شہری کے گھر پیدا ہوا، گائے اور بچھڑا دونوں صحت مند ہیں، اروند کے مطابق اس کا پورا خاندان بچھڑے کو دیکھ کر حیران رہ گیا۔
بھارتی میڈیا کے مطابق بچھڑے کی پیدائش کی خبر دور دراز اضلاع تک پھیل گئی، قریبی اضلاع اور دیہات کے لوگ اسے دیکھنے کے لیے آرہے ہیں۔
ویٹرنری ڈاکٹرز کے مطابق یہ کوئی معجزہ نہیں ہے، رحم میں جنین کی نشونما کے دوران خلیات بہت سارے حصوں میں تقسیم ہوجاتے ہیں اور اس عمل کے دوران بعض اوقات خلیوں کی اضافی نشونما ہوتی ہے اس لیے دو سر بنتے ہیں۔
واضح رہے کہ گزشتہ سال فروری میں بھارت کے گاؤں پاراسالائی میں عجیب الخلقت گائے کے بچے کی پیدائش ہوئی تھی جس کے دو سر، چار آنکھیں، دو منہ اور دو کان تھے۔
گائے کے بچے کو دیکھنے کے لیے دور دراز کے شہروں سے لوگ آ رہے تھے، کسان بھشکر کا کہنا تھا کہ زمینداری کے ساتھ مویشی پالنے کا کام اُن کا جدی پشتی ہے مگر وہ پہلی بار اس طرح کی گائے دیکھ رہے ہیں۔
اُن کا کہنا تھا کہ ہمیں ایسے بچھڑے کی توقع نہیں تھی، پیدائش پر مجھ سمیت سارے گھر والے بچھڑے کو دیکھ کر حیران رہ گئے۔
