راولاکوٹ: آزاد کشمیر کے شہر راولاکوٹ میں جیل سے فرار مزید 2 قیدی پکڑ لیے گئے۔
تفصیلات کے مطابق ایس ایس پی راولاکوٹ ریاض مغل نے بتایا ہے کہ ڈسٹرکٹ جیل پونچھ سے فرار ہونے والے مزید دو قیدی گرفتار کر لیے گئے ہیں۔
دونوں قیدیوں کو راولپنڈی جاتے ہوئے گرفتار کیا گیا، ایس ایس پی کے مطابق فرار قیدیوں میں سے اب تک 6 کو پکڑا جا چکا ہے، جب کہ مزید 12 قیدیوں کو جلد گرفتار کر لیا جائے گا۔
یاد رہے کہ ایک ہفتہ قبل آزاد کشمیر میں ایک ڈسٹرکٹ جیل سے 19 قیدی پولیس اہلکار کو یرغمال بنا کر فرار ہو گئے تھے، جن میں سے ایک قیدی پولیس فائرنگ سے ہلاک ہو گیا تھا، ایس ایس پی راولاکوٹ کے مطابق ہلاک ہونے والا قیدی خیام منشیات کے کیس میں گرفتار تھا، پولیس حکام کا کہنا تھا کہ مفرور ملزمان میں زیادہ تر سزائے موت کے قیدی شامل ہیں۔
راولاکوٹ جیل واقعہ، جیل سپرنٹنڈنٹ معطل، ڈپٹی سپرنٹنڈنٹ گرفتار، آئی جی جیل او ایس ڈی بنا دیے گئے
پولیس نے شہر کے اطراف میں سخت ناکہ بندی کی ہوئی ہے، اور فرار قیدیوں کو زور و شور سے تلاش کیا جا رہا ہے، آئی جی پی آزاد کشمیر نے عوام سے بھی اپیل کی ہے کہ وہ قیدیوں کو دوبارہ پکڑنے میں پولیس کی مدد کریں۔
فرار کے واقعے کے بعد غفلت برتنے پر آئی جی جیل خانہ جات کی تنزلی کی گئی تھی، اور جیل سپرنٹنڈنٹ سمیت 8 اہلکاروں کو معطل کر دیا گیا تھا۔ جب کہ ڈپٹی سپرنٹنڈنٹ اور 7 اہلکاروں کو گرفتار کر کے ان سے تفتیش کی گئی۔ واضح رہے کہ فرار قیدی غازی شہزاد کو آزاد کشمیر ہائیکورٹ نے 20 جون کو میرپور منتقل کرنے کا حکم دیا تھا۔
