اسلام آباد: دبئی سے اسلام آباد ایئر پورٹ پہنچنے والے 2 مسافر صحت کے عملے کو چکما دے کر رفو چکر ہو گئے، مسافروں کا درجہ حرارت زیادہ نکلا تھا۔
اے آر وائی نیوز کے مطابق گزشتہ روز اسلام آباد ایئر پورٹ پر دل چسپ صورت حال پیدا ہو گئی، بیرون ملک سے آنے والے 2 مسافر کرونا وائرس کا نام سنتے ہی محکمہ صحت کے عملے کو چکما دے کر ایئر پورٹ سے رفو چکر ہو گئے۔
ایئر پورٹ ذرایع نے بتایا کہ ملک اسحاق اور ملک احسان پرواز پی اے 613 کے ذریعے دبئی سے اسلام آباد ایئر پورٹ پہنچے تھے، دوران اسکریننگ مسافروں کے جسم کا درجہ حرارت زیادہ نکلا، جس پر محکمہ ہیلتھ کے ڈاکٹرز نے مسافروں کو پمز اسپتال منتقل کرنے کی سفارش کی، تاہم پمز اسپتال منتقل ہونے کا سننتے ہی مسافر ایئر پورٹ پر ایک بچی اور تین فیملی ممبران کو چھوڑ کر بھاگ نکلے۔
ایئر پورٹ منیجر کا کہنا تھا کہ بورڈنگ کارڈ سے مسافروں کا موبائل نمبر لے کر ان سے رابطہ کیا گیا، اور انھیں پمز اسپتال میں داخل ہونے کے لیے مشکل سے قائل کیا گیا، بعد ازاں مسافر پمز منتقل ہونے کے لیے راضی ہو گئے، جس کے بعد انھیں اسپتال منتقل کر دیا گیا۔
