آگرہ: اترپردیش کے آگرہ میں واقع برہما کماری آشرم میں دو سگی بہنوں نے انتہائی قدم اٹھاتے ہوئے اپنی زندگی کا خاتمہ کرلیا، خودکشی کرنے قبل دونوں بہنوں نے آشرم کے واٹس ایپ پر ایک خودکشی نوٹ بھی بھیج دیا۔
بین الاقوامی خبر رساں ادارے کی رپورٹ کے مطابق دونوں بہنوں نے اپنی خودکشی کا ذمہ دار آشرم کے چار ملازمین کو ٹھہرایا ہے۔
مذکورہ واقعے کی اطلاع موصول ہوتے ہی پولیس موقع پر پہنچ گئی اور تحقیقات کا آغاز کردیا، پولیس ذرائع کا کہنا ہے کہ ہم یہ جاننے کی کوشش کررہے ہیں کہ آخر کن حالات میں ان بہنوں کو خودکشی جیسا انتہائی قدم اٹھانا پڑا۔
دونوں بہنیں آگرہ کے جاگنیر میں واقع برہما کماری آشرم میں رہائش پذیر تھیں، دونوں نے خودکشی کرنے سے پہلے آشرم کے واٹس ایپ پر ایک خودکشی نوٹ بھیجا تھا۔
رپورٹس کے مطابق خودکشی نوٹ میں دونوں بہنوں نے موت کے لیے آشرم کے چار ملازمین کو ذمہ دار ٹھہرایا ہے، انہوں نے یہ بھی لکھا کہ ان کی موت کے بعد آشرم کو غریب بچوں کی تعلیم کے لیے استعمال کیا جانا چاہیے۔
بتایا گیا کہ دونوں بہنوں نے آٹھ سال قبل برہما کماری میں دیکشا (سنیاس) لی تھی۔ تب سے وہ آشرم میں زندگی بسر کر رہی تھی۔
آگرہ پولیس کی جانب سے مذکورہ معاملے کی تحقیقات کا آغاز کردیا گیا ہے، لڑکیوں نے خودکشی نوٹ میں جن ملازمین کے نام لئے ہیں ان پر کیا الزامات عائد کئے ہیں، اس حوالے سے تفصیلات تاحال سامنے نہیں آسکی ہیں۔
