سعودی حکومت نے بلدیاتی کونسلوں اور آباد کاری کے شعبوں میں 20 ہزار سعودی شہریوں کو روزگار فراہم کرنے کا پروگرام مرتب کیا ہے۔
سعودی گزٹ رپورٹ کے مطابق وزارت بلدیات و دیہی و آباد کاری امور اور فروغ افرادی قوت فنڈ نے باہمی تعاون کی ایک مفاہمتی یادداشت پر دستخط کیے ہیں جس کے مطابق تعلیمی اداروں سے فارغ ہونے والے 20 ہزار طلبہ کو سرکاری اداروں اور منفرد کمپنیوں میں روزگار کی تربیت دی جائے گی۔
یادداشت پر دستخط کا مقصد بلدیات اور آبادکاری شعبے میں سعودی نوجوانوں آئندہ دو برسوں کے دوران ’تمھیر‘ کے عنوان سے ملازمت کے ساتھ تربیت فراہم کرنا ہے اور یہ کام ’دروب‘ پلیٹ فارم پر ای ٹریننگ کے ذریعے کیا جائے گا۔
اس پروگرام کے تحت چھوٹے اور درمیانے سائز کے اداروں کو مضبوط بنانے کے ساتھ پرائیویٹ سیکٹر کے ملازمین کی صلاحیتوں کا معیار بلند کیا جائے گا۔ ایسے اداروں کے کارکنان کو بھی ٹریننگ کا حصہ بنایا جائے گا جو بغیر منافع کے چل رہے ہیں۔
تعاون کی یادداشت پر مملکت کے کئی وزرا کی موجودگی میں دستخط کیے گئے، تقریب میں وزیر بلدیات اور دیہی و آباد کاری امور ماجد الحقیل، وزیر نقل و حمل و لاجسٹک خدمات انجینیئر صالح الجاسر، وزیر ماحولیات وپانی وزراعت عبدالرحمن الفضلی اور وزیر سیاحت احمد الخطیب موجود تھے۔
