راولپنڈی : بھارتی فوج نے لائن آف کنٹرول (ایل او سی) پر سیزفائر کی خلاف ورزی کرتے ہوئے شہری آبادی پر بلااشتعال فائرنگ کی، جس کے نتیجے میں 20 سالہ لڑکا شدید زخمی ہوگیا۔
پاک فوج کے شعبہ تعلقات عامہ (آئی ایس پی آر) کے مطابق بھارتی فوج کی ایل او سی پر اشتعال انگیزیاں جاری ہیں، بھارتی فوج نے باگسر سیکٹر پر شہری آبادی پر بلااشتعال فائرنگ کی ، فائرنگ سے مہتیکا گاؤں کا 20 سالہ لڑکا شدید زخمی ہوگیا، زخمی نوجوان کو فوری علاج کیلئے قریبی طبی مرکز منتقل کر دیا گیا ہے۔
یاد رہے گذشتہ ہفتے بھی بھارتی فوج نے رکھ چکری سیکٹر پر شدید فائرنگ کی تھی، جس کے نتیجے میں کرنی گاؤں کی عمررسیدہ خاتون زخمی ہوگئی تھیں۔
آئی ایس پی آر کے مطابق بھارتی فوج نے جان بوجھ کر شہری آبادی کو نشانہ بنایا جب کہ پاک فوج نے بھرپور جوابی کارروائی کرتے ہوئے بھارتی چیک پوسٹوں کو نشانہ بنایا تھا۔
اس سے قبل 5 جولائی کو بھی بھارتی فوج نے لائن آف کنٹرول (ایل او سی) پر بلا اشتعال فائرنگ کی ، جس کے نتیجے میں خاتون 22 سالہ شہری زخمی ہوگیا تھا۔
خیال رہے رواں سال بھارت کی جانب سے لائن آف کنٹرول پر جنگ بندی کی 1550 بار خلاف ورزیاں کی گئی ہیں جبکہ شہری آبادی کو نشانہ بنانے سے 14 افراد شہید اور 114 زخمی ہو چکے ہیں۔
