The news is by your side.

2022 فلسطین کے لیے خوں آشام سال، اسرائیلی فوج نے ’ڈریکولا‘ کی یاد تازہ کر دی

رام اللہ: دنیا بھر میں گزرے سال کو الوداع اور نئے سال کو خوش آمدید کہا گیا، لیکن فلسطین ان چند ممالک میں سے ہے جن کے لیے گزرا سال ایک بھیانک خواب کی طرح مسلط رہا۔

2022 فلسطین کے لیے ایک خوں آشام سال ثابت ہوا، جب کہ اسرائیلی فوج نے فلسطینی علاقوں میں نوجوانوں کا بے دردی سے قتل عام کر کے ’ولاد ڈریکولا‘ کی یاد تازہ کر دی۔

ولاد ڈریکولا پندرھویں صدی کے وسط میں رومانیہ کا حکمران تھا، جس نے ہزاروں ترک اور بلغاروی شہریوں کا نہایت بے دردی سے خون بہایا، یہ اس کا خوں خوار کردار تھا جو بعد میں خون پینے والے افسانوی کردار ’ڈریکولا‘ میں بدل گیا۔

عرب نیوز کے مطابق گزشتہ برس 2022 میں بھی اسرائیلی فوج نے فلسطینیوں کا بے دردی سے قتل کیا، اس بدترین سال میں بڑے پیمانے پر اسرائیلی فوج کے ہاتھوں ہلاکتیں ہوئیں، نہ صرف یہ بلکہ اسرائیلی جارحیت میں بھی بے تحاشا اضافہ دیکھنے میں آیا۔

فلسطینی حکومت کے ترجمان ابراہیم میلہم نے عرب نیوز کو بتایا کہ ’جس پیمانے پر اسرائیلی فوج نے فلسطینیوں کو ہلاک کیا اس اعتبار سے 2022 بدترین سال تھا۔ سرکاری اعداد و شمار کے مطابق گزشتہ بارہ ماہ کے دوران مغربی کنارے اور غزہ میں 225 فلسطینی شہید ہوئے۔‘

گزشتہ برس اسرائیلی فورسز نے مغربی کنارے اور غزہ میں کم عمر لڑکوں کا بھی بے رحمی سے قتل کیا، میڈیا پر قتل کی چند خبروں نے دنیا بھر کی نگاہیں اپنی طرف مرکوز کرائیں، ان میں سب سے مشہور قتل الجزیرہ کی خاتون صحافی شیریں ابو عاقلہ کا تھا، اسرائیلی فورسز نے نابلس میں ایک مشہور نوجوان فلسطینی فٹبالر احمد دراغمہ کو بھی گولیاں مار کر شہید کیا۔

تاہم ابراہیم میلہم کا کہنا ہے کہ فلسطینیوں کی جدو جہد کے لیے عرب ممالک کے علاوہ بین الاقوامی سطح پر جس طرح سے یکجہتی کا مظاہرہ کیا گیا ہے اس سے امید پیدا ہوئی ہے۔ انھوں نے کہا کہ بین الاقوامی تنظیموں نے واضح کیا ہے کہ انھیں فلسطینی عوام کے حقوق اور مطالبات کی سمجھ ہے۔

یروشلم میں فتح تحریک کے رہنما احمد غنیم کا کہنا ہے کہ فلسطینی مزاحمتی جنگجوؤں کی نئی نسل کا ابھرنا سال 2022 کی سب سے مثبت بات ہے۔

واضح رہے کہ سال 2022 کے آخری دن 31 دسمبر کو اقوام متحدہ کی جنرل اسمبلی میں فلسطینی علاقوں پر اسرائیلی قبضے سے متعلق رائے شماری ہوئی جس میں 87 ممالک نے فلسطین کے حق میں ووٹ ڈالا ہے۔

Comments

یہ بھی پڑھیں