سال 2023 میں یو ایس ایڈ نے پاکستان کو مستحکم بنانے کے لیے مختلف شعبوں میں اشتراکی منصوبوں اور پروگراموں میں اپنا بھرپور تعاون جاری رکھا۔
یو ایس ایڈ، حکومت پاکستان کے ساتھ پنج سالہ دو طرفہ ترقیاتی امدادی معاہدے کے تحت 445.6 ملین ڈالرز کی گرانٹ مہیا کرے گا، جنوری 2023 میں جینیوا میں موسمیاتی تبدیلیوں کی عالمی کانفرنس میں یو ایس اے آئی ڈی کی ڈپٹی ایڈمنسٹریٹر ازوبیل کولمین نے اضافی 100 ملین ڈالر کا اعلان کیا۔
2023 میں امریکا نے پاکستان میں سیلاب متاثرین اور قدرتی آفات سے نمٹنے اور خوراک کی دستیابی کے لیے 215 ملین ڈالر فراہم کیے، پاک امریکا گرین الائنس کا قیام مستقبل میں آنے والے سیلابوں کو روکنے اور شدت کم کرنے کی جانب اہم اقدام رہا۔
یو ایس اے آئی ڈی کی ڈپٹی ایڈمنسٹریٹر نے سیلاب سے متاثرہ علاقوں کا دورہ کیا، اور یو ایس ایڈ کے تعاون سے اس سال صحت کے شعبے میں 30 ملین ڈالر فراہم کیے گئے۔
اس سال یو ایس ایڈ نے HEC کے ساتھ اشتراک میں سیلاب متاثرین طلبہ میں 600 سے زائد اسکالر شپس تقسیم کیے۔ اس سال سندھ بیسک ایجوکیشن پروگرام کے تحت یوایس ایڈ کے تعاون سے 100 اسکولوں کی تعمیر کا سنگِ میل عبور کیا گیا، سندھ میں 2024 تک 80 ہزار طلبہ یو ایس اے آئی ڈی کے سندھ بیسک ایجوکیشن پروگرام کے تحت تعلیم سے مستفید ہوں گے۔
سال 2023 میں بچیوں کی تعلیم کی اہمیت کو اجاگر کرنے کے لیے یو ایس اے آئی ڈی نے شاہد آفریدی کے ساتھ ایک وسیع مہم چلائی، جولائی میں امریکا نے یو ایس ایڈ کے ذریعے ’ریچارج پاکستان‘ کے نام سے ایک منصوبے کا آغاز کیا، اس منصوبے میں موسمیاتی لچک کو بڑھانے کے لیے 77.8 ملین ڈالر کی سرمایہ کاری شامل ہے، اس منصوبے کا مقصد سیلاب کے خدشات اور خشک سالی کو کم کرنا اور اہم شعبوں میں اقتصادی ترقی کو فروغ دینا ہے۔
اس سال یو ایس ایڈ کے زیرِ اہتمام پاک یو ایس ڈائسپورا کانفرنسوں کے تحت متعدد اہم کاروباری شراکت داری کے معاہدوں پر دستخط کیے گئے، یو ایس ایڈ کی انویسٹمنٹ پروموشن ایکٹویٹی کے ذریعے پاکستان کی اقتصادی ترقی کے لیے گرانٹس فراہم کی گئیں۔
