امریکا میں صدارتی انتخاب کے دو مضبوط امیدواروں نائب صدر کاملا ہیریس اور سابق صدر ڈونلڈ ٹرمپ کے علاوہ قومی، ریاستی اور مقامی سطح پر بھی الیکشن ہو رہے ہیں۔
امریکی صدارتی انتخاب کی مہم آخری روز میں داخل ہوتے ہی ریاست پنسلوینیا انتخابی طور پر میدان جنگ بن گئی جسے جیتنے کے لیے دونوں صدارتی امیدوار ایڑی چوٹی کا زور لگارہے ہیں۔
یہاں ڈونلڈ ٹرمپ اور کاملاہیرس کی ووٹرز کو قائل کرنے کی آخری اور سر توڑ کوششیں جاری ہیں انتخابی مہم کے آخری روز کاملاہیرس کی ریاست پنسلوانیا پر توجہ مرکوز رہی۔
امریکی صدارتی انتخاب 2024
ڈونلڈ ٹرمپ کا حامیوں سے خطاب
سابق صدرڈونلڈ ٹرمپ نے شمالی کیرولینا، پنسلوانیا اور مشی گن کا ہنگامی دورہ کیا، ٹرمپ نے اپنے حامیوں سے خطاب میں کہا کہ ہم جوہری جنگ عظیم سوئم کے بہت قریب پہنچ چکے ہیں، صدر منتخب ہوکر تیسری جنگ عظیم شروع ہونے سے روکوں گا۔
ٹرمپ کا کہنا تھا کہ اگرمیں صدر ہوتا تو 7 اکتوبر کا واقعہ کبھی رونما نہ ہوتا، صدر بننے کے بعد مشرق وسطیٰ میں جاری کشیدگی ختم کروں گا، ہم جوبائیڈن کے خراب نظام کو ٹھیک کریں گے، اقتدار میں آکر نئی نوکریاں فراہم کرکے عوام کو خوشحال بنائیں گے۔
انہوں نے کہا کہ الیکشن کے نتائج 5نومبر کو ہی سامنے آنے چاہئیں، یہ ہمارے لیے ہمیشہ کے لئے آخری موقع ہے۔
کاملا ہیرس کا حامیوں سے خطاب
دوسری جانب کاملا ہیرس نے بھی اپنے حامیوں سےخطاب میں یقین دہانی کرائی کہ منتخب ہوکر تمام امریکیوں کی صدر بنوں گی، ہم جیتیں گے کیوں کہ ہم جانتے ہیں کہ کس مقصد کیلئے کھڑے ہیں۔
کاملاہیرس کا کہنا تھا کہ نئی شروعات کیلئے تیار ہیں جہاں امریکیوں کو دشمن نہیں پڑوسی کے طور پر دیکھا جائیگا، ٹرمپ کا قبل از وقت جیت کا دعویٰ حقیقت سے توجہ ہٹانا ہے۔
انہوں نے کہا کہ 2020کا صدارتی انتخاب شفاف تھا جس میں ڈونلڈ ٹرمپ کو شکست ہوئی، ہمیں اب بھی امید ہے کہ 2024کا انتخاب بھی صاف و شفاف ہوگا۔
