The news is by your side.

Advertisement

مرحوم رشتے دار کے چھپائے ہوئے پیسے ملنے پر جوڑا خوشی سے نہال

انگلینڈ میں ایک جوڑا اس وقت غیر متوقع خوشی سے دو چار ہوگیا جب کرسمس کے موقع پر ان کے مرحوم رشتے دار کے چھپائے ہوئے پیسے انہیں مل گئے۔

اس کا آغاز انگلینڈ کے علاقے مڈسمر نورٹن میں واقع ایک ری سائیکلنگ سینٹر سے ہوا جہاں جوڑے نے گھر سے نکلا ہوا غیر ضروری سامان چھوڑا۔ سینٹر کے ملازمین نے ایک ڈبے پر کام کرنے سے قبل اسے اچھی طرح چیک کیا تو اندر سے ساڑھے 19 ہزار ڈالر سے زائد رقم برآمد ہوئی۔

ملازمین نے فوری طور پر پولیس کو اطلاع دی اور جلد ہی پولیس نے اس جوڑے کی کار کی شناخت کرلی جنہوں نے اسی دن صبح بہت سا سامان بشمول اس ڈبے کے سینٹر میں چھوڑا تھا۔

پولیس نے جوڑے سے رابطہ کیا تو انہوں نے بتایا کہ انہوں نے ایک مرحوم رشتہ دار کا گھر صاف کیا تھا۔ وہیں سے انہوں نے بے شمار اضافی ڈبے اور دیگر ساز و سامان کو غیر ضروری جان کر ری سائیکلنگ سینٹر میں دینے کا فیصلہ کیا تھا۔

مذکورہ جوڑے نے بتایا کہ ان کا مرحوم رشتہ دار پیسہ بچانے اور انہیں غیر متوقع جگہوں پر چھپا کر رکھنے میں مشہور تھا۔ اس کے باوجود انہیں اس کی اس چھپائی ہوئی رقم کے بارے میں جان کر نہایت حیرت ہوئی۔ پولیس نے رقم جوڑے کے حوالے کردی۔

بعد ازاں پولیس نے ری سائیکلنگ سینٹر کے ملازمین کا بے حد شکریہ ادا کیا اور کہا کہ اگر وہ اس ایمانداری کا مظاہرہ نہ کرتے تو مذکورہ خاندان اس رقم سے لاعلم رہتا لیکن اب کرسمس کے موقع پر وہ غیر متوقع طور پر ایک خطیر رقم حاصل کرنے میں کامیاب رہے۔

Comments

یہ بھی پڑھیں