اسلام آباد: بابا گرو نانک کی برسی پر پاکستان آنے والے سکھ یاتریوں کو بڑی خوشخبری مل گئی
تفصیلات کے مطابق بابا گرو نانک کی برسی پر بھارتی سکھ یاتریوں کی پاکستان آمد سے متعلق این سی او سی کا اہم اجلاس ہوا، اجلاس کا اعلامیہ جاری کردیا گیا ہے، جس کے مطابق بابا گرو نانک کی برسی پر بھارتی سکھ یاتریوں کو شرکت کی اجازت دینےکا فیصلہ کیا گیا ہے۔
این سی اوسی کے مطابق بھارت بائیس مئی سے بارہ اگست تک سی کیٹگری میں شامل رہا، سی کیٹگری کی وجہ سے بھارتی سکھ یاتریوں کو محدودنقل و حرکت کی اجازت تھی۔
نیشنل کمانڈ اینڈ آپریشن سینٹرکے اعلامیہ کے مطابق بھارتی یاتریوں کی کرتار پور آمد کرونا ایس او پیز پر عملدرآمد سے مشروط ہو گی، بھارت سےمکمل ویکسین شدہ سکھ یاتریوں کو پاکستان داخلےکی اجازت ہوگی، مصدقہ کرونا ویکسین سرٹیفکیٹ والےسکھ یاتری کرتار پور صاحب آسکیں گے۔
اعلامیے میں کہا گیا کہ بھارتی سکھ یاتریوں کو تین دن پرانی پی سی آرکرونا ٹیسٹ رپورٹ ساتھ لانا ہوگی،یاتریوں کو ریپڈکرونا ٹیسٹ پازیٹوآنے پر پاکستان داخلےکی اجازت نہیں ہوگی۔
یاد رہے کہ گوردوارہ دربار صاحب کرتارپور میں بابا گرونانک کی 482 ویں برسی کی تقریبات کا آغاز بیس ستمبر سے ہوگا، تقریبات تین روز تک جاری رہے گی۔
