کوئٹہ : بلوچستان میں شدید بارشوں سے ضلع بولان میں 24 انچ قطر کی گیس پائپ لائن سیلابی پانی میں بہہ گئی ، جس کے باعث دارلحکومت سمیت پانچ اضلاع کو گیس کی فراہمی معطل ہو گئی۔
تفصیلات کے مطابق بلوچستان میں شدید بارشوں سے گیس پائپ لائن بھی متاثر ہوگئی۔
ضلع کچھی بولان میں بی بی نانی پل کے قریب ندی میں شدید سیلابی ریلے سے گیس پائپ لائن ٹوٹ گئی اور پائپ کا بڑا حصہ پانی میں بہہ گیا۔
جس کے بعد کوئٹہ ،پشین ،زیارت،مستونگ اور قلات کو گیس کی فراہمی معطل ہوگئی ہے۔
سدرن گیس کمپنی حکام کا کہنا ہے لپ گیس کی 24 انچ قطر کی متاثرہ پائپ لائن کی مرمت کے لیے ایس ایس جی سی کی ٹیمیں موقع پر پہنچ چکی ہیں۔
حکام نے بتایا کہ سیلابی ریلے کی وجہ سے متاثرہ پائپ لائن کی مرمت کا کام شروع نہیں کیا جا سکا، ندی میں پانی کے بہاومیں کمی کے بعد پائپ لائن کی مرمت کا کام شروع کیا جائے گا۔
ذرائع مواصلات نہ ہونےکےباعث مرمت کے کام کی پیشرفت معلوم ہونے میں کچھ وقت لگے گا، متبادل پائپ لائن سے گیس کی فراہمی بحال کرنےکی کوشش کررہے ہیں۔
