راولپنڈی: نیشنل ٹی ٹوئنٹی کپ کی دفاعی چیمپئن خیبر پختونخواہ نے ایونٹ میں مسلسل دوسری فتح حاصل کرتے ہوئے اپنے عزائم ظاہر کردئیے۔
تفصیلات کے مطابق راولپنڈی کرکٹ اسٹیڈیم میں کھیلے گئے نیشنل ٹی ٹوئنٹی کپ کے پانچویں میچ میں کے پی نے سدرن پنجاب کو باآسانی سات وکٹوں سے شکست دیکر ٹورنامنٹ میں مسلسل دوسری فتح حاصل کرلی ہے، 153 رنز کا ہدف کے پی نے آخری اوور میں حاصل کیا۔
کے پی کے کپتان محمد رضوان کی نیشنل ٹی ٹوئنٹی کپ میں عمدہ کارکردگی کا سلسلہ جاری ہے، آج بھی انہوں نے 64 رنز کی شاندار اننگز کھیلتے ہوئے اپنی ٹیم کی فتح میں اہم کردار ادا کیا، صاحب زادہ فرحان 73 رنز بناکر نمایاں رہے۔
سدرن پنجاب کی جانب سے نسیم شاہ نے2، فیصل اکرم نےایک کھلاڑی کوآؤٹ کیا۔
یہ بھی پڑھیں: دفاعی چیمپئن کے پی کا نیشنل ٹی ٹونٹی میں فاتحانہ آغاز
اس سے قبل سدرن پنجاب کی پوری ٹیم 152 رنز بناکر آؤٹ ہوگئی تھی، کے پی کی جانب سے عمران خان نے عمدہ بولنگ کرتے ہوئے 4 کھلاڑیوں کو پویلین کی راہ دکھائی، شاہین شاہ آفریدی نے 3 جبکہ محمد وسیم نے بھی دو وکٹیں حاصل کیں۔
اس سے قبل دفاعی چیمپئن خیبرپختونخوا نے نیشنل ٹی ٹونٹی کپ کے پہلے میچ میں سینٹرل پنجاب کو 36 رنز سے شکست دیتے ہوئے پہلی فتح اپنے نام کی تھی۔
