اسلام آباد: قطر میں پھنسے پاکستانی وطن واپس پہنچ گئے، 251 مسافر قطر ایئر لائن کی پرواز کے ذریعے اسلام آباد ایئر پورٹ پہنچے۔
تفصیلات کے مطابق بیرون ملک پھنسے پاکستانیوں کی واپسی کے لیے سول ایوی ایشن کے اقدامات جاری ہیں، قطر ایئر لائن کی پرواز کیو آر 632 کے ذریعے 251 مسافر دوحہ سے اسلام آباد ایئرپورٹ پہنچ گئے۔
ایئر پورٹ پہنچنے پر ڈاکٹرز کی خصوصی ٹیم نے مسافروں کی طبی جانچ اور اسکریننگ کی جس کے بعد مسافروں کو مختص ہوٹلز اور ضلعی انتظامیہ کے قرنطینہ مراکز منتقل کردیا گیا۔
اس سے قبل جمعے کی رات پی آئی اے کی پرواز پی کے 758 کے ذریعے 250 افراد سعودی عرب سے پاکستان واپس پہنچے تھے۔
یہ جدہ سے پانچویں پرواز تھی، اب تک خصوصی پروازوں کے ذریعے ایک ہزار سے زائد مسافر پاکستان واپس پہنچ چکے ہیں۔
ریاض میں پاکستانی سفارتخانہ اور جدہ میں پاکستان قونصلیٹ سعودی عرب میں پھنسے پاکستانیوں کی بحفاظت وطن واپسی کے انتظامات کی نگرانی کر رہے ہیں۔
