راوپنڈی: آرمی چیف جنرل عاصم منیر کی زیرِ صدارت 259ویں کور کمانڈرز کانفرنس میں شرکا نے خصوصی سرمایہ کاری سہولت کونسل (ایس آئی ایف سی) کی زیرِ نگرانی جاری معاشی سرگرمیوں کی مکمل حمایت کے عزم کا اظہار کر دیا۔
فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر کی زیرِ صدارت جی ایچ کیو میں کور کمانڈرز کانفرنس منعقد ہوئی۔
کانفرنس میں اس بات کا اعادہ کیا گیا کہ ملک میں معاشی سرگرمیاں جو اس وقت (SIFC) کی زیرِ نگرانی جاری ہیں اُس کی مکمل حمایت کی جائے گی اور ایسی سرگرمیاں جو معیشت کو نقصان پہنچا سکتی ہیں اس کے خاتمے کیلیے حکومت کی مکمل معاونت کی جائے گی۔
علاوہ ازیں کانفرنس کے شرکا نے مسلح افواج، قانون نافذ کرنے والے اداروں کے افسران و جوان اور سول سوسائٹی کے شہداء، جنہوں نے ملک کی حفاظت، سلامتی اور وقار کیلیے اپنی جانوں کا نذرانہ پیش کیا، اُن کی عظیم قربانیوں کو زبردست خراج تحسین پیش کیا۔
شرکا نے اس عزم کا اعادہ کیا کہ ریاست پاکستان اور مسلح افواج شہداء اور ان کے اہل خانہ کو ہمیشہ احترام کی نگاہ سے دیکھتی ہیں۔ شہداء کے ایصال ثواب کیلیے فاتحہ خوانی بھی کی گئی جبکہ 6 ستمبر کو ملک بھر میں یومِ دفاع و شہدا بھرپور طریقے سے منانے پر فوج نے اپنی قابلِ فخر قوم کا شکریہ ادا کیا۔
کانفرنس کے شرکا نے ہر قسم کے بالواسطہ اور بلاواسطہ خطرات کے خلاف پاکستان کی خود مختاری اور علاقائی سالمیت کے دفاع کیلیے فوج کے عزم کا اعادہ کیا۔
فورم نے ایک بار پھر اس بات کی توثیق کی کہ ریاستی اداروں اور عوام کے درمیان خلیج پیدا کرنے کیلیے مذموم پروپیگنڈا کرنے والوں کو مایوسی کے سوا کچھ حاصل نہیں ہوگا اور اس کے نتیجے میں ایسے عناصر مزید رسوائی کا شکار ہوں گے۔
کانفرنس میں اس بات کو یقینی بنایا گیا کہ دہشتگرد جو پاکستان کو غیر مستحکم کرنے کی کوششوں میں مصروف ہیں وہ، ان کے سہولت کاروں اور ان کی حوصلہ افزائی کرنے والے عناصر کے خلاف ریاست مکمل طاقت کے ساتھ نمٹے گی۔
کانفرنس کے دوران ضم شدہ اضلاع اور بلوچستان کے بارڈر اضلاع میں پائیدار امن و ترقی پر بھی زور دیا گیا۔
کانفرنس کے شرکا کو قومی سلامتی کو درپیش چیلنجز اور بڑھتے ہوئے خطرات کے جواب میں اپنی حکمت عملی کے بارے میں بھی بریفنگ دی گئی۔
آرمی چیف جنرل عاصم نے آپریشنز کے دوران پیشہ وارانہ مہارت کے معیار کو برقرار رکھنے اور فارمیشنز کی تربیت کے دوران بہترین کارکردگی کے حصول پر زور دیا۔
انہوں نے اپنے فوجیوں کی فلاح و بہبود اور حوصلہ برقرار رکھنے اور مسلسل توجہ دینے پر کمانڈرز کی تعریف کی جو فوج کی آپریشنل تیاری کی بنیاد ہے۔
