راولپنڈی: انسداد دہشتگردی عدالت نے سابق خاتون اوّل بشریٰ بی بی کی 26 نومبر جلاؤ گھیراؤ کے 29 مقدمات میں عبوری ضمانت میں توسیع کر دی۔
انسداد دہشتگردی عدالت میں بشریٰ بی بی کے خلاف 26 نومبر جلاؤ گھیراؤ کے 29 مقدمات میں عبوری ضمانت کی درخواستیں سماعت ہوئی، وکیل محمد فیصل ملک عدالت میں پیش ہوئے۔
29 مقدمات میں بشریٰ بی بی کی عبوری ضمانت میں آج تک توسیع تھی تاہم عدالت نے 26 جون تک توسیع کر دی۔
یہ بھی پڑھیں: بشریٰ بی بی کا احتجاجاً کمرہ عدالت آنے سے انکار، جج برہم
مقدمات راولپنڈی اور اٹک، ٹیکسلا، حسن ابدال کے مختلف تھانوں میں درج ہیں جس میں بانی پی ٹی آئی عمران خان، بشریٰ بی بی، شاہ محمود قریشی، علی امین گنڈاپور و دیگر پی ٹی آئی کے مرکزی رہنما نامزد ہیں۔
عدالت نے تفتیشی افسران کو ملزمہ کو جیل میں شامل تفتیش کیے جانے کا حکم دے رکھا ہے، عدالت میں پراسیکیوٹر ظہیر شاہ پیش ہوئے تھے۔
20 مئی 2025 کو عدالت نے سابق خاتون اوّل کی ضمانت میں 12 جون تک توسیع کی تھی۔ دوران سماعت ملزمہ کی جانب سے معروف قانون دان محمد فیصل ملک عدالت میں پیش ہوئے تھے۔
فروری میں اسلام آباد ہائیکورٹ نے 26 نومبر کے مقدمات میں گرفتار تمام پی ٹی آئی ورکرز کو فوری رہا کرنے کا حکم دیا تھا، عدالت نے ایک سو بیس کارکنوں کی ضمانتیں منظور کی تھی۔
اسلام آباد ہائیکورٹ نے گرفتار ملزمان کو بیس ہزار کے ضمانتی مچلکے اور بیان حلفی جمع کروانے کا بھی حکم دیا تھا۔
خیال رہے کہ پی ٹی آئی کی جانب سے 26 نومبر کو احتجاج کے دوران پولیس نے متعدد کارکنوں کو حراست میں لیا تھا جن کی رہائی کیلیے عدالت سے رجوع کیا گیا تھا۔
