معروف ٹک ٹاکر اور اپنے آپ سے شادی کرنے والی ترکیہ کی 26 سالہ نوجوان سوشل میڈیا سیلیبرٹی نے زندگی کا خاتمہ کرلیا۔
ترکیہ کی 26 سالہ ٹک ٹاکر کبریٰ آئیکت نے استنبول میں واقع رہائشی عمارت کی پانچویں منزل سے چھلانگ لگا کر خود کشی کی جبکہ یہ واقعہ 23 ستمبر کو پیش آیا، حکام کو جائے وقوعہ سے ایک خط بھی ملا ہے۔
کبریٰ 2023 اپنی وائرل ویڈیو ’دولہا کے بغیر شادی‘ کے باعث مشہور ہوئی تھیں، ان کی خودکشی سے کچھ دنوں پہلے بہت سے مداحوں نے کبریٰ کی سوشل میڈیا پوسٹس پر تشویش کا اظہار کیا تھا۔
ٹک ٹاکر کی پوسٹ پریشان کن دکھائی دے رہی تھیں، کبریٰ نے اپنی موت سے چند گھنٹے قبل اکاؤنٹ پر ایک خط شیئر کیا تھا جس میں انھوں نے اپنے وزن میں کمی کے بارے میں بات کی تھی۔
سوشل میڈیا انفلوئینسر نے لکھا تھا کہ میرا وزن روزانہ کے حساب سے گررہا ہے، مجھے سمجھ میں نہیں آرہا کہ میں کیا کروں، میں نے ہرکوشش کرلی لیکن وزن میں اضافہ نہیں ہورہا۔
ترک حکام کا کہنا تھا کہ کبریٰ آئیکت کی لاش پورسٹ مارٹم کےلیے بھجوائی گئی ہے، اس کی رپورٹ آنے کے بعد ہی ان کی خودکشی یا مرنے کے حوالے سے تفصیلات سامنے آئیں گی۔
