لاہور: 26ویں آئینی ترمیم کی 10 شقوں کو چیلنج کر دیا گیا، لاہور ہائیکورٹ میں شاہد رانا ایڈووکیٹ نے درخواست دائر کردی۔
سینیٹ اور قومی اسمبلی سے پاس ہونے والی 26ویں آئینی ترمیم کے خلاف درخواست شاہد رانا ایڈووکیٹ کی جانب سے دائر کی گئی ہے، لاہور ہائیکورٹ میں دائر درخواست میں درخواست گزار کا کہنا تھا کہ ترمیم عدلیہ کی آزادی کے خلاف ہے۔
شاہد رانا ایڈووکیٹ کی جانب سے دائر درخواست میں چیف الیکشن کمشنر کی تعیناتی سے متعلق شق کو بھی چیلنج کیا گیا ہے۔
خیال رہے کہ گزشتہ دنوں پاکستان کے دونوں ایوانوں نے 26 ویں آئینی ترمیم کی منظوری دے دی تھی، 225 ارکان نے ترمیم کے حق میں ووٹ دیا جبکہ اپوزیشن کے بارہ ارکان نے مخالفت کی تھی۔
منظور ہونے والی 26 ویں آئینی ترمیم کے تحت چیف جسٹس آف پاکستان کی تقرری کے طریقہ کار میں بھی نمایاں تبدیلی کی گئی ہے۔
آئینی ترمیم کے بعد جسٹس یحییٰ آفریدی کی بطور چیف جسٹس آف پاکستان تعینات کردی گئی ہے، یہ تعیناتی 26 اکتوبر سے 3 سال کیلئے کی گئی ہے۔
