کوئٹہ: مستونگ واقعے میں شہریوں کی بڑی تعداد میں جانوں کے ضیاع پر بلوچستان میں آج سے 3 روزہ سوگ منایا جا رہا ہے۔
تفصیلات کے مطابق مستونگ میں جلوس پر خود کش دھماکے کے بعد حکومت بلوچستان نے تین روزہ سوگ کا اعلان کیا ہے، بلوچستان اسمبلی، وزیر اعلیٰ ہاؤس، گورنر ہاؤس، بلوچستان ہائیکورٹ سمیت تمام سرکاری عمارتوں پر قومی پرچم سرنگوں کر دیا گیا ہے۔
مستونگ دھماکے میں زخمی ہونے والے شہریوں کو سول اسپتال ٹراما سینٹر، سی ایم ایچ کوئٹہ، نواب غوث بخش رئیسانی اسپتال مستونگ، ڈی ایچ کیو مستونگ میں طبی امداد دی جا رہی ہے، گزشتہ روز 15 سے زائد زخمیوں کو سی ایم ایچ کوئٹہ اسپتال منتقل کیا گیا تھا۔
مستونگ میں جلوس میں ہونے والے خودکش حملے کا مقدمہ درج
واضح رہے کہ گزشتہ روز بلوچستان کے ضلع مستونگ میں میلادالنبی کے جلوس میں خودکش دھماکے میں ڈی ایس پی سمیت 54 افراد شہید ہو گئے تھے، جب کہ 100 سے زائد زخمی ہوئے ہیں، دھماکا الفلاح روڈ پر مسجد کے قریب جلوس کے آغاز پر ہی ہوا، ڈی ایس پی نواز گشکوری خودکش حملہ آور کو روکنے کی کوشش میں شہید ہوئے، 3 کانسٹیبل زخمی ہوئے۔
دھماکے میں عالم دین مفتی سعید احمد بھی جان سے گئے، ایک گھر کے 4 افراد بھی لقمہ اجل بنے، شدید زخمیوں کو سول اسپتال کوئٹہ منتقل کیا گیا، جہاں 8 کی حالت تشویش ناک بتائی جاتی ہے۔
