لاہور : تین سال کی بچی کو اغواء کرنے والا خواتین کا گروہ پکڑا گیا، گروہ میں ایک کم عمر لڑکا بھی شامل ہے، بچی کو والدین کے حوالے کردیا گیا۔
تفصیلات کے مطابق پولیس نے لاہور میں اغواء کے اگلے روز ہی بچی کو بازیاب کرالیا، گروہ میں شامل تین عورتوں اور لڑکے کو گرفتار کرلیا، لاہور کے علاقے گرین ٹاؤن سے تین سال کی ماہ نور کو جمعرات کو لاپتہ ہوئی تھی۔
پولیس کو ملنے والی گلی میں لگے سی سی ٹی وی کیمرے کی ویڈیو میں ایک عورت بچی کا ہاتھ پکڑے گلی کے کونے پر کھڑی نظرآئی، اس موقع پر دو خواتین اور ایک لڑکا بھی قریب آگئے۔
انہوں نے گلی کے کونے پر کچھ دیر بات چیت کی جس کے بعد لڑکے نے بچی کو گود میں لیا اور چاروں چلتے بنے، پولیس نے فوٹیج اور جدید ٹیکنالوجی کو استعمال کرتے ہوئے اڑتالیس گھنٹوں میں سبزہ زار کے علاقے ملتان ٹاؤن سے بچی کو بازیاب کرایا اور ملزمان کو گرفتار کرلیا۔
بعد ازاں بچی کو والدین کے حوالے کردیا گیا، ایس پی صدر انوسٹی گیشن نے اغواء کاروں کی گرفتاری پر پولیس ٹیم کے لئے تعریفی اسناد کا اعلان کیا ہے۔
