اسلام آباد: وزیراعظم شہباز شریف 31 مئی سے 2 جون تک برادر ملک ترکی کا دورہ کریں گے۔
وفاقی وزیر اطلاعات مریم اورنگزیب نے اپنے آفیشل ٹوئٹر اکاؤنٹ سے جاری بیان میں بتایا کہ وزیراعظم شہباز شریف اکتیس مئی سے دو جون تک برادر ملک ترکی کا دورہ کریں گے، وزیراعظم کا ترکی کا دورہ پاکستان کے روایتی با اعتماد دوستوں اور برادر ممالک سے دوطرفہ تعلقات کی تجدید کے سلسلے کی کڑی ہے۔
انہوں نے بتایا کہ یہ دورہ دونوں ممالک کے درمیان تعلقات کے فروغ کے علاوہ سرمایہ کاری، تجارت، صحت، تعلیم،ثقافت اور باہمی مفاد کے دیگر شعبہ جات میں تعاون کے حوالے سے بھی نہایت اہم ہے۔
وزیراعظم شہباز شریف 31 مئی سے 2 جون تک برادر ملک ترکی کا دورہ کریں گے۔ یہ دورہ پاکستان کے روایتی بااعتماد دوستوں اور برادر ممالک سے دوطرفہ تعلقات کی تجدید کے سلسلے کی کڑی ہے۔#پاک_ترک_دوستی_زندہ_باد#Pak_Turkey_Friendship_Zindabad pic.twitter.com/fBdsX19jOJ
— Marriyum Aurangzeb (@Marriyum_A) May 30, 2022
دورے میں وزیراعظم پاک ترکی بزنس کونسل کے اجلاس میں شریک ہونگے جبکہ ترک سرمایہ کاروں اور تاجروں سے ملاقاتیں بھی شیڈول کا حصہ ہیں۔
وفاقی وزیر اطلاعات نے بتایا کہ وزیراعظم دورے کے دوران مصطفیٰ کمال اتاترک کے مزار پر حاضری دیں گے۔
اس کے علاوہ عزت مآب صدر رجب طیب اردوان کے ہمراہ وزیراعظم ترکی اور پاکستان کے سفارتی تعلقات کے قیام کے 75 سال مکمل ہونے کے موقع پر یادگاری نشان جاری کریں گے، صدر اردوان وزیراعظم کے اعزاز میں عشائیہ دیں گے۔
