آستانہ: قازقستان میں کوئلے کی کان میں لگنے والی شدید آگ کے باعث 32 کان کن اپنی زندگیوں سے محروم ہوگئے۔
بین الاقوامی خبر رساں ادارے کی رپورٹ کے مطابق قازقستان کے وسطی علاقے میں واقع انڈسٹریل زون میں کوئلے کی کان میں خوفناک آگ بھڑک اُٹھی جس کے باعث 32 کان کن لقمہ اجل بن گئے، جبکہ متعدد کے زخمی ہونے کی اطلاعات سامنے آرہی ہیں۔
- Advertisement -
کمپنی کے مطابق جس وقت یہ افسوسناک حادثہ رونما ہوا اس وقت کان میں 200 کان کن کام کرنے میں مصروف تھے، ریسکیو کا عمل تیز کردیا گیا ہے، جبکہ اموات میں اضافے کا خدشہ ظاہر کیا جارہا ہے۔
واضح رہے کہ برطانوی اسٹیل کمپنی کی نگرانی میں کام کرنے والی کان میں یہ آگ لگنے کا 2ماہ میں دوسرا واقعہ ہے، اس سے قبل اگست میں کان میں آگ لگنے سے 5 کان کن اپنی زندگیوں سے محروم ہوگئے تھے۔
