اسلام آباد: کراچی میں کرنٹ لگنے سے 23-2022 میں 33 شہریوں کی ہلاکت کے کیس میں نیپرا نے کےالیکٹرک پر جرمانہ عائد کردیا۔
نیپرا نے جاری شوکاز نوٹس پر کےالیکٹرک کا جواب مسترد کردیا اور ایک کروڑ روپے کا جرمانہ عائد کیا ہے، نیپرا نے کے الیکٹرک پرجرمانہ لگانے کے فیصلے کا حکم نامہ جاری کردیا، 15 روز میں جرمانے کی رقم نامزد کردہ بینک میں جمع کرانے کا حکم دیا گیا ہے۔
ایک متاثرہ خاندان کے لواحقین کو 35 لاکھ روپے معاوضہ ادا کرنے کا حکم دیا گیا ہے، اس کے علاوہ ایک متاثرہ محمد اسلم کے خاندان کے وارث کو ملازمت دینے کی بھی ہدایت کی۔
حکم نامے میں کہا گیا کہ نیپرا نے اگست 2023 میں کے الیکٹرک کو شوکاز نوٹس جاری کیا تھا، کےالیکٹرک شوکاز نوٹس کے جواب پر نیپرا کو مطمئن نہیں کرسکا، 23-2022 میں 33 شہریوں کی ہلاکتیں ہوئیں تھیں۔
نیپرا نے حکم نامے میں مزید کہا کہ شہریوں کی ہلاکت پر کےالیکٹرک کے خلاف کارروائی کا آغاز کیا تھا، کےالیکٹرک، نیپرا قوانین پرعمل درآمد کرانے میں ناکام رہا۔
