لاگوس: نائجیریا میں اسکول کے میلے میں بھگدڑ مچنے سے 35 بچے لقمہ اجل بن گئے جبکہ 6 زخمی ہوگئے۔
بین الاقوامی خبر رساں ادارے کی رپورٹ کے مطابق حادثہ جنوب مغربی نائجیریا کے شہر عبادان میں رونما ہوا، پولیس ترجمان نے بتایا کہ اسکول میلے میں بھگدڑکی تحقیقات کے لیے 8 افراد کو حراست میں لے لیا گیا ہے۔
پولیس ترجمان کے مطابق قانون نافذ کرنے والے اداروں نے اس معاملے کی تحقیقات کا آغاز کردیا ہے۔
اس سے قبل نمیبیا میں پیش آنے والے افسوسناک واقعے میں کھیل کے دوران 4 کمسن بچے فریزر میں دم گھٹنے سے زندگی کی بازی ہار گئے تھے۔
نمیبیا کے کاتیما ملیلو قصبے میں ایک گھر کے باہر موجود غیر استعمال شدہ فریزر میں دم گھٹنے سے 3 سے 6 سال کی عمر کے درمیان کے 4 بچے جاں بحق ہوگئے تھے۔
پولیس ذرائع کا اس حوالے سے کہنا تھا کہ بچے کھیلتے ہوئے حادثاتی طور پر فریزر میں پھنس گئے تھے جہاں دم گھٹنے کی وجہ سے جاں بحق ہوگئے۔
رپورٹس کے مطابق 2 بچے فریزر کے اندر ہی جاں بحق ہوگئے تھے جبکہ باقی 2 کو بے ہوشی کی حالت میں اسپتال پہنچایا گیا، مگر وہ بھی جانبر نہ ہوسکے۔
نایاب مرض میں مبتلا 11 ماہ کی بچی کو انجکشن کے لیے چاہیے 14 کروڑ روپے
پولیس کا کہنا ہے کہ فریزر کے باہر صرف ایک ہینڈل تھا، بچے تقریباً ایک سے ڈیڑھ گھنٹے فریزر میں پھنسے رہے، یہ واضح نہیں ہوسکا کہ غیر استعمال شدہ فریزر گھر کے باہر کیوں رکھا گیا تھا۔
