بھارت میں اتراکھنڈ کے ضلع الموڑا میں پیش آنے والے ہولناک حادثے کے نتیجے میں 36افراد لقمہ اجل بن گئے۔
بین الاقوامی خبر رساں ادارے کی رپورٹ کے مطابق 45 سیٹوں والی مسافر بس آج صبح اتراکھنڈ کے ضلع الموڑ میں مارچولا کے مقام پر 200 میٹر گہری کھائی میں گر گئی۔
رپورٹس کے مطابق بس رات کے سفر پر بھی، حادثہ رام نگر سے تقریباً 35 کلومیٹر دور پیش آیا۔ پولیس اور اسٹیٹ ڈیزاسٹر ریسپانس فورس کی جانب سے موقع پر ریسکیو آپریشن شروع کر دیا گیا ہے۔
حکام کے مطابق قریبی گاؤں کے رہائشیوں نے سب سے پہلے امدادی کارروائیوں میں حصہ لیا، کئی مسافر موقع پر ہی جاں بحق ہوگئے، جبکہ کم از کم 9 زخمی مسافر اسپتال منتقل کرتے وقت راستے میں دم توڑ گئے۔
بھارتی میڈیا رپورٹس کے مطابق تین انتہائی زخمی مسافروں کو ہیلی کاپٹر کے ذریعے اے آئی آئی ایم ایس منتقل کیا جا رہا ہے۔ بس گڑھوال موٹر اونرز یونین کی بتائی جارہی ہے۔
پولیس کے مطابق حادثے کی وجوہات جاننے کے لیے تحقیقات شروع کردی گئی ہیں، الموڑا اور رام نگر سے متعلقہ حکام جائے حادثہ پر موجود ہیں۔
لڑکی جھولے سے گر کر جان کی بازی ہار گئی
چیف منسٹر پشکر سنگھ دھامی کا کہنا ہے کہ ضلعی انتظامیہ کو ریسکیو آپریشن تیز کرنے کی ہدایت کی گئی ہے، اُن کا کہنا تھا کہ بس حادثے کی خبر انتہائی افسوسناک ہے، ضلعی انتظامیہ کو فوری طور پر امدادی اور ریسکیو آپریشن تیزی سے انجام دینے کی ہدایت کردی گئی ہے۔
