لاہور : لاہور پولیس نے زمان پارک کے باہر ہنگامہ آرائی کے چارمقدمات درج کرلیے ، جس میں عمران خان سمیت دیگر رہنماؤں کو نامزد کیا گیا ہے۔
تفصیلات کے مطابق لاہورمیں پی ٹی آئی چیئرمین عمران خان کی گرفتاری کے معاملے پر پولیس نے ایک ہی تھانہ ریس کورس میں ایک وقوعہ کی چار ایف آئی آرز درج کرلیں۔
ایف آئی آرز میں عمران خان سمیت پی ٹی آئی کی دیگر قیادت کو نامزد کیا گیا ہے اور مقدمات میں کار سرکار میں مداخلت ، سرکاری املاک کو نقصان ، پولیس اہلکاروں پر پتھراؤ کے الزامات عائد کئے گئے ہیں۔
تمام ایف آئی آرز میں مختلف دفعات کے ساتھ دہشت گردی ایکٹ کی دفعات بھی شامل کرلی گئیں۔
مقدمات میں الزام عائد کیا گیا کہ اسلام آباد پولیس پنجاب پولیس کی معاونت سے عمران کی خان کی گرفتاری کے لئے زمان پارک گئی ، جہاں عمران خان اور دیگر رہنماؤں کی قیادت میں کارکنوں نے شدید مزاحمت کی۔
مقدمات میں کہا گیا کہ پولیس پر پتھراؤ کیا، پیٹرول بم پھینکے گئے ، سرکاری گاڑیوں کو آگ لگائی اور دیگر املاک کو نقصان پہنچایا گیا۔
ایف آئی آرز میں کہنا تھا کہ پتھراؤ اور پیٹرول بموں کے حملوں میں 60 کے قریب اہلکار زخمی ہوئے جبکہ پی ٹی آئی کے بھی متعدد کارکن زخمی ہوئے، زخمی ہونے والوں میں ڈی آئی جی آپریشنز اسلام آباد بھی شامل ہیں۔
مقدمہ نمبر چار سو تیرہ ایلیٹ فورس اہلکار محمد شبیر کی مدعیت ، مقدمہ نمبر چار سو چودہ زعیم الرحمان واسا ملازم کی، مقدمہ نمبر چار سو بارہ ظٖفر القدوس کی اور مقدمہ نمبر چار سو دس ایس ایچ او ریس کورس ریحان انور کی مدعیت میں درج کیا گیا۔
