کراچی: شہر قائد میں جرائم پیشہ افراد کے حوصلے مزید بڑھ گئے، کھارادر کے علاقے میں اسٹریٹ کرائم کی واردات میں ہتھوڑے کا آزادانہ استعمال کیا گیا۔
اے آر وائی نیوز کے مطابق جرائم پیشہ افراد نے سیکیورٹی گارڈ کو ہتھوڑا مار کر زخمی کیا اور موبائل چھین لیا، ملزم نے قریب موجود دیگر شہریوں سے بھی ہتھوڑا دکھا کر لوٹ مار کی۔
پولیس کا کہنا ہے کہ کھارادر جماعت خانہ کے قریب واردات کی فوٹیج سامنے آگئی ہے، واردات 2 روز قبل پیش آئی، مقدمہ ڈاکس تھانے میں درج کرلیا گیا ہے۔
دوسری جانب پولیس کا پاک کالونی بڑا بورڈ میں لیاری گینگ وار کے ملزمان سے مقابلہ ہوا، دو طرفہ فائرنگ میں پولیس نے 2 ملزمان زخمی حالت میں گرفتار کرلئے۔
ملزم غلام فرید اور ارسلان سے 2 پستول اور موٹر سائیکل برآمد کرلی گئی، گرفتار ملزمان کاشف ڈاڈا گروپ کے کارندے ہیں۔
ایک اور واقعے میں لیاقت آباد ڈاک خانہ پل پر فائرنگ سے کار سوار شہری زخمی ہوگیا۔
پولیس کے مطابق فائرنگ کاواقعہ ڈکیتی کے دوران مزاحمت کا نتیجہ ہے، گاڑی نہ روکنے پر ڈاکوؤں نے فائرنگ کی۔