کراچی: محکمہ موسمیات کا کہنا ہے کہ شہر قائد میں آج بھی موسم گرم اور مرطوب رہے گا، شہر کا موجود درجہ حرارت 31 ڈگری سینٹی گریڈ ہے۔
اے آر وائی نیوز کے مطابق محکمہ موسمیات کا کہنا ہے کہ آج زیادہ سے زیادہ درجہ حرارت 37 سے 39 ڈگری سینٹی گریڈ رہنے کا امکان ہے۔
محکمہ موسمیات کے مطابق دوپہر میں درجہ حرارت 42 ڈگری سینٹی گریڈ تک محسوس کیا جائے گا، اس وقت ہوائیں 12 کلو میٹر فی گھنٹے کی رفتار سے چل رہی ہیں، جبکہ ہوامیں نمی کا تناسب 76 فی صد ہے۔
دوسری جانب پاکستان میں بڑھتے ہوئے درجہ حرارت کے باعث موسمیاتی الرٹ جاری کردیا گیا، جس میں کہا ہے گلیشیئر سے بنی جھیلیں بپھرنے کا خدشہ پیدا ہوگیا ہے۔
تفصیلات کے مطابق پاکستان میٹرولوجیکل ڈیپارٹمنٹ نے بڑھتے ہوئے درجہ حرارت کے پیش نظر گلگت بلتستان کیلئے موسمیاتی الرٹ جاری کردیا۔
جس میں کہا ہے کہ 21 تا 27 مئی تک گلگت بلتستان اور کے پی میں درجہ حرارت بڑھے گا، درجہ حرارت میں 4 سے 6 ڈگری تک اضافہ ہوگا۔
محکمہ موسمیات کی جانب سے وارننگ جاری کی گئی ہے کہ موسمیاتی صورت حال سے گلیشیئر جھیلوں کے پھٹنے کے امکانات ہے۔
درجہ حرارت بڑھنے سے فلیش فلڈز آنے کے امکانات بڑھ جائیں گے، جبکہ چترال کے علاقوں میں برفانی جھیلیں پھٹنے سے سیلاب آسکتے ہیں۔
کراچی میں اگلے 10 روز موسم کیسا رہے گا؟ چیف میٹرولوجسٹ کی اہم پیش گوئی
محکمہ موسمیات نے ضلعی انتظامیہ، مقامی آبادیوں کو محتاط رہنے کی ہدایت کرتے ہوئے کہا متعلقہ اداروں کو چوکس رہنے کی ضرورت ہے۔
