قاہرہ: دریائے نیل میں کشتی ڈوبنے سے چار پاکستانی جاں بحق ہوگئے جبکہ چھ کو بچالیا گیا ہے ۔
مغربی خبر ایجنسی کے مطابق کشتی دریائے نیل میں بنے پُل کے ستون سے ٹکرانے کے بعد ڈوبی ۔ ڈوب کر جاں بحق ہونے والے چار افراد کا تعلق پاکستان سے ہے، کشتی کے چھ مسافروں کو بچالیا گیا۔
مصر کے میرین پولیس چیف کے مطابق کشتی میں سوار افراد قانونی طور پر سفر کر رہے تھے۔
ترجمان دفتر خارجہ نے تصدیق کرتے ہوئے کہا کہ پاکستان سے تعلق رکھنے والے تین خاندانوں کے دس افراد کشتی پر مصر کے تاریخی دریائے نیل کی سیر کو نکلے کہ ان کی کشتی دریا میں پل کے ایک ستون سے ٹکرا کر ڈوب گئی، امدادی ٹیموں نے دس میں سے چھ افراد کو بچالیا۔
حادثے میں ڈوب کر جاں بحق ہونیوالوں میں فیصل خان اور اسکی اہلیہ ثناعروج سمیت پانچ سالہ بچی رومیسا اور دو سال کی آمنہ بھی شامل ہے۔
دفتر خارجہ کے مطابق فیصل خان کی لاش دریا سے نکال لی گئی ہے جبکہ دیگر کی تلاش کا کام جاری ہے۔
