کیف : یوکرین حکام نے الزام عائد کیا ہے کہ ملک میں روسی فوج کی جانب سے کیے گئے حملوں میں اب تک 400سے زائد یوکرینی بچے جان کی بازی ہار چکے ہیں۔
غیرملکی خبر رساں ادارے کی رپورٹ کے مطابق یوکرین کے پراسیکیوٹر جنرل نے اپنے حالیہ بیان میں کہا ہے کہ روس کے حملے کے نتیجے میں اب تک 437 بچے ہلاک ہوچکے ہیں۔
پراسیکیوٹرکا کہنا ہے کہ جنگ کے دوران میزائل حملوں سے مشرقی ڈونیٹسک کا علاقہ سب سے زیادہ متاثر ہوا ہے جہاں 423 بچے ہلاک یا زخمی ہوئے۔
دوسری جانب اقوام متحدہ کی ایک رپورٹ میں کہا گیا ہے کہ 24 فروری سے روس کی جانب سے کیے جانے والے حملوں کے بعد سے اب تک یوکرین میں مجموعی طور پر 16 ہزار 295 شہری ہلاک ہوچکے ہیں۔
شہری آبادی پر حملوں کو کیف اور مغربی رہنماؤں نے بلااشتعال جارحیت قرار دیا ہے جبکہ ماسکو کی جانب سے جنگ کے دوران شہریوں کو نشانہ بنانے کی تردید کی گئی ہے۔
