کراچی اور حیدرآباد ڈویژن کے 16 اضلاع میں ہونے والے بلدیاتی انتخابات کے نتائج آنے کا سلسلہ جاری ہے شہر قائد کی 246 میں 150 یوسیز کے غیر سرکاری اور غیر حتمی نتائج سامنے آگئے ہیں۔
اے آر وائی نیوز کے مطابق سندھ میں بلدیاتی انتخابات کے دوسرے مرحلے میں گزشتہ روز کراچی اور حیدرآباد ڈویژن کے 16 اضلاع میں ہونے والے بلدیاتی انتخابات کے تاحال مکمل نتائج نہیں آسکے ہیں۔ الیکشن کمیشن کے واضح احکامات کے باوجود 20 گھنٹے گزر جانے کے باوجود نتائج مکمل نہیں ہوسکے ہیں۔
کراچی میں جماعت اسلامی، پی ٹی آئی اور پی پی پی میں سخت مقابلہ جاری ہے۔ حیدرآباد، بدین اورسندھ کے دیگر اضلاع میں پیپلزپارٹی کو برتری حاصل ہے۔ تاہم مجموعی طور پر ٹرن آؤٹ انتہائی کم رہا۔ ضلع وسطی اور شرقی میں جماعت اسلامی کے زیادہ امیدوار کامیاب ہوئے۔ ضلع ملیر اور جنوبی میں تیر چل گیا۔ لیاری اورکیماڑی میں بھی جیالوں نے میدان مارلیا۔
غیر سرکاری اور غیر حتمی نتائج کے مطابق 150 یوسیز میں سے 75 نشستوں پر پیپلز پارٹی کامیابی حاصل کرکے آگے ہے جب کہ جماعت اسلامی 40 نشستوں پر کامیابی کے ساتھ دوسرے نمبر پر ہے۔ پی ٹی آئی نے 35 نشستوں پر فتح سمیٹ رکھی ہے۔ تاہم تینوں جماعتوں میں مقابلہ جاری ہے اور جہاں نتائج آنے باقی ہیں وہاں جاری گنتی کے مطابق کہیں ترازو کا پلڑا بھاری ہے تو کہیں تیر اور کہیں بلا چل رہا ہے۔ اس حوالے سے جماعت اسلامی اور پیپلز پارٹی کی جانب سے کراچی میں اکثریت لینے کے دعوے سامنے بھی آچکے ہیں۔
کراچی کے ضلع شرقی ٹاؤن میونسپل کارپوریشن سہراب گوٹھ یوسی ایک کے غیر سرکاری اور غیر حتمی نتائج کے مطابق یہاں سے بھی پی ٹی آئی کے دولت خان چیئرمین اور سفیر اللہ وائس چیئرمین 1074 ووٹ لے کر کامیاب جب کہ آزاد امیدوار ہمایوں اور نور محمد 850 ووٹ لے کر دوسرے نمبر پر رہے۔ سہراب گوٹھ یوسی 2 سے پی ٹی آئی کے حیات اللہ اور عبدالمالک نے 1427 ووٹ لے کامیابی حاصل کی جب کہ آزاد امیدوارو محمد گل اور شہباز گبول 833 ووٹ لے کر دوسرے نمبر پر رہا۔
ضلع شرقی ٹاؤن میونسپل کارپوریشن سہراب گوٹھ یوسی 3 کے غیر سرکاری اور غیر حتمی نتیجے کے مطابق پیپلز پارٹی کے حسین برفت اور قادر بخش پر مشتمل پینل 726 ووٹ لے کر کامیاب رہا جب کہ پی ٹی آئی 321 کے ساتھ دوسرے نمبر پر آئی۔
ضلع شرقی ٹاؤن میونسپل کارپوریشن چنیسر یوسی3 کے غیر سرکاری و غیر حتمی نتائج کے مطابق جما عت اسلامی کے شاہد فرمان اور محمد فراز آفریدی 4155 ووٹ لے کر کامیاب رہے جب کہ پی ٹی آئی کا پینل 2233 ووٹ لے کر دوسرے نمبر پر رہا۔
ضلع جنوبی ٹاؤن میونسپل کارپوریشن لیاری یوسی ایک کے غیر سرکاری اور غیر حتمی نتیجے کے مطابق جماعت اسلامی کے فتح محمد چیئرمین اور محمد یوسف962 ووٹ لے کر وائس چیئرمین کامیاب قرار پائے۔ پی ٹی آئی 835 ووٹ لے کر یہاں دوسرے نمبر پر آئی۔ لیاری یوسی 3 سے پی پی کے عنایت اللہ اور شکیل احمد 3638 ووٹ لے کر پہلے نمبر پر رہے۔ پی ٹی آئی 1496 ووٹ لے کر دوسرے نمبر پر آئی۔ لیاری کی یونین کونسل 5 پر پی پی کے شاہد حسین بلوچ اور محمد عرفان 3651 ووٹ لے کر فاتح ٹھہرے۔ پی ٹی آئی کے شاہد علی اور خالد پر مشتمل پینل 3488 ووٹ لے کر دوسرے نمبر پر رہا۔
ضلع جنوبی ٹاؤن میونسپل کارپوریشن لیاری یوسی 8 سے بھی پی پی کامیاب قرار پائی۔ عبدالمجید اور جمیل احمد پر مشتمل پینل 4894 ووٹ لے کر پہلے نمبر پر رہا۔ جماعت اسلامی کے امیدوار 1943 ووٹ لے کر دوسرے نمبر پر آئے۔ لیاری یوسی 9 کے غیر سرکاری اور غیر حتمی نتائج کے مطابق پی پی کے غلام یاسین اور محمد اقبال ہنگورو 3480 ووٹ لے کر چیئرمین اور وائس چیئرمین منتخب ہوگئے۔ پی ٹی آئی کے مزمل اور محمد نوید 3003 ووٹ لے کر دوسرے نمبر پر رہے۔ لیاری یوسی 11 کے غیر سرکاری اور غیر حتمی نتائج کے مطابق یہاں پی پی نے میدان مارا۔ محمد اسلم میمن اور محمد اقبال پر مشتمل پینل 2051 ووٹ لے کر کامیاب رہا۔ پی ٹی آئی کے امیدوار 1748 ووٹ لے کر دوسرے نمبر پر رہے۔
ضلع جنوبی ٹاؤن میونسپل کارپوریشن صدر یوسی 4 کے غیر سرکاری وغیر حتمی نتائج کے مطابق یہاں پی ٹی آئی نے میدان مارا۔ طاہر پرویز اور عبدالرحمان پر مشتمل پینل 1273 ووٹ لے کر پہلے نمبر پر رہا۔ جماعت اسلامی کے امیدوار 1104 ووٹوں کے ساتھ دوسرے نمبر پر رہے۔ صدر یوسی 13 کے غیر سرکاری وغیر حتمی نتائج کے مطابق پی پی کے کرم اللہ اور وسیم گل 3744 ووٹ لے کر چیئرمین اور وائس چیئرمین منتخب ہوگئے۔ پی ٹی آئی 1744 ووٹ لے کر دوسرے نمبر پر رہی۔
ضلع جنوبی ٹاؤن میونسپل کارپوریشن صدر یوسی 8 سے پی ٹی آئی کو فتح ملی۔ احمد سلمان اور شاکر اللہ 2829 ووٹ لے کر چیئرمین اور وائس چیئرمین منتخب ہوگئے۔ جماعت اسلامی کا دوسرا نمبر رہا۔ صدر یوسی 9 سے پی ٹی آئی آئی کے محمد علی رضا چیئرمین اور محمد رحمان وائس چیئرمین 2233 ووٹ لے کر کامیاب رہے ہیں جب کہ جماعت اسلامی کے محمد فاضل اور غلام رزاق 1944 ووٹ لے کر دوسرے نمبر پر رہے ہیں۔
ضلع وسطی ٹاؤن میونسپل کارپوریشن لیاقت آباد یوسی4 کے غیر سرکاری اور غیر حتمی نتائج کے مطابق جماعت اسلامی کے عبید احمد خان اور طلحہ حسیب 1818 ووٹ لے کر کامیاب رہے۔ پی ٹی آئی کے امیدوار ظہور حسن اور ظفر بیگ 1260 ووٹوں کے ساتھ دوسرے نمبر پر رہے۔
ضلع وسطی ٹاؤن میونسپل کارپوریشن گلبرگ یوسی ایک سے جماعت اسلامی فاتح رہی۔ عاصم علی مخدومی اور صابر حسین 3139 ووٹ لے کر چیئرمین اور وائس چیئرمین منتخب ہوگئے۔ پی ٹی آئی نے 2395 ووٹ حاصل کیے۔ گلبرگ یوسی 2 کے غیر سرکاری اور غیر حتمی نتائج میں یہاں بھی جماعت اسلامی نے میدان مارا۔ فیصل شیخاور ظہیر مصطفیٰ پر مشتمل پینل 5567 ووٹ لے کر کامیاب رہا۔ پی ٹی آئی 2631 ووٹوں کے ساتھ دوسرے نمبر پر رہی۔
ضلع وسطی ٹاؤن میونسپل کارپوریشن نارتھ ناظم آباد یوسی 4 کے غیر سرکاری اور غیر حتمی نتائج کے مطابق جماعت اسلامی کا محمد ابرار اور سید ذیشان علی پر مشتمل پینل 6428 ووٹ لے کر کامیاب رہا۔ پی ٹی آئی نے 2807 ووٹ حاصل کرکے دوسری پوزیشن حاصل کی۔
ضلع ملیر ٹاؤن میونسپل کارپوریشن ملیر یوسی 9 سے پی پی کے صابر علی اور محمد ابراہیم پر مشتمل پینل 1394 ووٹ لے کر کامیاب رہا۔ جماعت اسلامی 1058 ووٹوں کے ساتھ دوسرے نمبر پر آئی۔
ضلع کیماڑی ٹاؤن میونسپل کارپوریشن بلدیہ یوسی 8 سے پی پی کے محمد فاروق اور محمد آصف پر مشتمل پینل 2660 ووٹ لے کر کامیاب قرار پایا۔ پی ٹی آئی 1717 ووٹ حاصل کرکے دوسرے نمبر پر رہی۔
ضلع غربی ٹاؤن میونسپل کمیٹی منگھو پیر یوسی4 کے غیرسرکاری اور غیر حتمی نتائج کے مطابق پی ٹی آئی کا عاطف حیات اور جبران شیخ پر مشتمل پینل 1309 ووٹ لے کامیاب رہا ہے جب کہ جماعت اسلامی یہاں دوسرے نمبر پر رہی۔
