وزیراعلیٰ بلوچستان ڈاکٹر عبدالمالک بلوچ نے کہا ہے کہ صوبوں کو ملنے والے اختیارات کسی صورت واپس نہیں ہونے دیں گے۔
اٹھارہویں ترمیم کے ذریعے صوبوں کو ملنے والے اختیارات سے متعلق صوبائی محکموں کے افسران کو آگاہی فراہم کرنے کے حوالے سے کوئٹہ میں بلوچستان حکومت کے تعاون سے دو روزہ سیمینار منعقد کیا گیا۔
سیمینار میں اٹھارہویں ترمیم کے لئے بنائی جانے والی پارلیمانی کمیٹی کے سابق سربراہ رضا ربانی نے خصوصی شرکت کی،سیمینار سے خطاب کرتے ہوئے سینیٹر رضا ربانی کا کہنا تھا کہ بعض قوتیں اٹھارہویں ترمیم کو رول بیک کرکے صوبوں کو ملنے والے اختیارات واپس لینا چاہتے ہیں۔
صوبے اپنے حقوق کے لئے اٹھ کھڑے ہوں، وزیراعلیٰ بلوچستان ڈاکٹر عبدالمالک بلوچ نے بھی سیمینار سے خطاب میں اٹھارہویں ترمیم کے خلاف کوششوں کا خدشہ ظاہر کرتے ہوئے کہا کہ اختیارات کے حصول کے لئے قوم پرست جماعتوں اور اکابرین نے بڑی قربانیاں دی ہیں کسی صورت اختیارات واپس نہیں ہونے دینگے۔
دو روزہ سیمینار میں صوبائی وزیر اطلاعات و پارلیمانی امور عبدالرحیم زیارتوال سمیت دیگر وزراءاور ارکان اسمبلی نے شرکت کی اور افسران سے خطاب بھی کیا، وزیراعلیٰ بلوچستان نے شریک افسران میں تربیت مکمل ہونے پر اسناد تقسیم کیں، سیمینار کے منتظمین کا کہنا ہے کہ افسران کی تربیت کے لئے صوبائی حکومت آئندہ بھی اس قسم کی تقاریب منعقد کرے گی۔
