کراچی : سندھ میں کوروناوائرس کے47نئےکیسزرپورٹ ہوئے، جس کے بعد کوروناکے مریضوں کی مجموعی تعداد 830 اور اموات کی کل تعداد 14 ہوگئی ہے۔
تفصیلات کے مطابق صوبائی وزیر صحت سندھ ڈاکٹر عذرا پیچوہو نے سندھ میں 47 نئے کرونا کیسز کی تصدیق کردی اور کہا آج رپورٹ ہونے والے تمام کیسز رابطہ کیسز کے طور پر سامنے آئے ہیں۔
ڈاکٹر عذرا پیچوہو کا کہنا تھا کہ صوبے بھر میں رابطہ کیسز کی تعداد 438 تک جا پہنچی ہے، نئے کیسز میں حیدرآباد اور بدین سے ایک ایک ، ٹنڈو محمد خان میں 5 اور جامشورو میں 2 کیسز سامنے آئے ہیں۔
محکمہ صحت سندھ کے مطابق اس کے علاوہ ٹنڈو محمد خان، گھوٹکی، دادو، بدین، شھید بینظیر آباد اور جیکب آباد سے بھی کرونا کیسز سامنے آئے ہیں۔
ڈاکٹر عذرا پیچوہو نے مزید بتایا کہ سندھ میں کرونا متاثرین کی مجموعی تعداد 830 ہو گئی جبکہ 751 مریض زیر علاج ہیں، جن میں کراچی میں 329، حیدرآباد میں 149 اور سکھر قرنطینہ میں 248 کرونا کے مریض ہیں جبکہ 65 ڈسچارج ہوچکےہیں۔،
وزیر صحت سندھ کا کہنا تھا کہ سندھ میں 7 ہزار 992 افراد کے کرونا ٹیسٹ کیے جا چکے ہیں جبکہ آج ہونے والی 3 اموات کے ساتھ سندھ میں کرونا سے متاثرہ اموات کی کل تعداد 14 ہوگئی ہے۔
خیال رہے پاکستان میں کورونا کیسز کی تعداد 2700 تک جا پہنچی جبکہ کورونا وائرس سے اموات کی تعداد 40ہوگئی ہے۔
