فلوریڈا : سانپ کو سامنے دیکھ کر لوگوں کے اوسان خطا ہوجاتے ہیں لیکن اگر کسی کے گھر میں اچانک سانپ آجائے تو یقینا لوگ وہاں سے بھاگنے میں ہی عافیت جانیں گے۔
امریکی ریاست فلوریڈا کے ایک علاقے میں اہل خانہ کے ہوش اس وقت اڑ گئے جب انھوں نے اپنے گھر میں دو منہ والا سانپ دیکھ لیا، پولیس کی خاتون اہلکاروں نے جان کو خطرے میں ڈال کر خطرناک سانپ کو قابو کرلیا۔
غیر ملکی خبر رساں ادارے کی رپورٹ کے مطابق ایسی ہی ایک تصویر سوشل میڈیا پر تیزی سے وائرل ہورہی ہے جس میں دیکھا جاسکتا ہے دوخواتین پولیس اہلکار سانپ پکڑ کر اس کے ساتھ تصویر بنوا رہی ہیں۔
قبل ازیں اہل خانہ نے پولیس کو اطلاع دی جس پر کارروائی کرتے ہوئے ایک خطرناک جانور کو وہاں سے نکال دیا جو کوئی انسان نہیں بلکہ ایک پانچ فٹ لمبا سانپ تھا۔ یہ سانپ اپارٹمنٹ میں رہائش پذیر شخص کے صوفےکے نچلے حصے میں بیٹھا ہوا تھا۔
اس حوالے سے فلوریڈا کے کلیر واٹر پولیس ڈپارٹمنٹ نے سوشل میڈیا پر شیئر ایک پوسٹ میں بتایا کہ پولیس آفیسرز کو ایک 55 سالہ رہائشی میریلین پائنز نے کال کرکے بتایا کہ ان کے صوفے کے نیچے ایک پانچ فٹ لمبا سانپ چھپا ہوا ہے۔
جس پر پولیس نے وہاں پہنچ کر صوفے کے کشن کے نیچے سے سرخ دم والے سانپ کو نکالا اور اسے ایک مقامی جانوروں کے نگہداشت مرکز منتقل کیا۔
