کوئٹہ: صوبہ بلوچستان کے تعلیمی اداروں میں کرونا وائرس کے 5 نئے کیسز رپورٹ ہوئے ہیں جس کے بعد تعلیمی اداروں سے سامنے آنے والے کوویڈ کیسز کی تعداد 550 ہوگئی ہے۔

تفصیلات کے مطابق محکمہ صحت بلوچستان کا کہنا ہے کہ بلوچستان کے تعلیمی اداروں میں کرونا وائرس کے 5 نئے کیسز رپورٹ ہوئے ہیں۔

محکمہ صحت کا کہنا ہے کہ تعلیمی اداروں میں کرونا وائرس کے مثبت کیسز کی تعداد 550 ہوگئی ہے۔

خیال رہے کہ ملک بھر میں کرونا وائرس کیسز کی مجموعی تعداد 3 لاکھ 13 ہزار 984 ہوچکی ہے جن میں سے فعال کیسز  8 ہزار 884 ہیں۔

ملک میں اب تک 6 ہزار 507 مریض کرونا وائرس کے باعث جاں بحق ہوچکے ہیں جبکہ صحت یاب ہونے والوں کی تعداد 2 لاکھ 98 ہزار 593 ہوچکی ہے۔

صرف بلوچستان میں رپورٹ کرونا کیسز کی تعداد 15 ہزار 281 ہوچکی ہے، گزشتہ 24 گھنٹوں میں 24 نئے کیسز سامنے آئے۔

صوبے میں کرونا وائرس سے گزشتہ روز ایک ہلاکت ہوئی جس کے بعد صوبے میں کرونا وائرس سے مجموعی ہلاکتوں کی تعداد 146 ہوچکی ہے۔