اگر آپ نوکری چھوڑنے کی وجوہات تلاش کر رہے ہیں تو اس صورتحال میں ہر ایک کے لیے ایک مشکل فیصلہ ہو سکتا ہے۔ تاہم روزگار کے نئے مواقع تلاش کرنے کے لیے اپنی موجودہ ملازمت کو چھوڑنے کی بہت سی وجوہات ہوسکتی ہیں۔
اگر آپ اپنی ملازمت سے خوش نہیں ہیں، تو اس کا اثر آپ کی زندگی کے دیگر پہلوؤں پر بھی پڑ سکتا ہے۔ ملازمت سے عدم اطمینان ایک تناؤ بھرے تجربے کے مترادف ہے، خاص طور پر جب آپ اپنی زندگی کا تقریباً ایک تہائی حصہ کام کرنے میں گزارتے ہیں۔ اگر آپ اپنی ملازمت کے حوالے سے ناخوشی یا ناپسندیدگی کا شکار ہیں، تو آپ شاید یہ سوچ رہے ہوں کہ کیا واقعی ملازمت چھوڑنے کا وقت آ چکا ہے۔
کئی علامات اور اشارے آپ کو یہ فیصلہ کرنے میں مدد دے سکتے ہیں کہ ملازمت چھوڑنے کا وقت آ گیا ہے لیکن یہ فیصلہ آسان نہیں ہوتا، خاص طور پر اس وقت جب مستقبل کی غیر یقینی صورتحال، پیشہ ورانہ اثرات، اور مالی خطرات کا سامنا ہو۔
اس کے علاوہ اگر آپ کو اپنی ملازمت کے دوران مندرجہ ذیل علامات کا سامنا کرنا پڑرہا ہو تو
آپ کو فوراً ملازمت چھوڑ دینی چاہیے (اگر ممکن ہو) ایسے انتباہات اس بات کی جانب اشارہ ہیں کہ اب آگے بڑھنے کا وقت آ گیا ہے اور آپ اپنی نوکری چھوڑنے پر غور شروع کردیں۔
1. ترقی کے مواقع کی عدم دستیابی
ایک کامیاب مستقبل کے لیے ترقی اور سیکھنے کے مواقع نہایت اہم ہیں، اگر آپ محسوس کرتے ہیں کہ آپ کی ملازمت میں کوئی بہتری یا ترقی کے مواقع نہیں ہیں، تو یہ اشارہ ہے کہ آپ کو آگے بڑھنے کی ضرورت ہے۔
اگر آپ کا کام ہمیشہ یکساں اور بورنگ محسوس ہوتا ہے، تو یہ صورتحال آپ کی پیشہ ورانہ صلاحیتوں کو کم کر سکتی ہے۔ بالخصوص، عمر کے درمیانی حصے میں (جب انسان اپنی زندگی میں مقصد اور جدت تلاش کرنے کی کوشش کرتا ہے)، ایسے ماحول میں کام کرنا آپ کی شخصیت پر منفی اثر ڈال سکتا ہے۔
اہم اشارے:
نئے چیلنجز یا مہارتوں کی کمی
کمپنی میں ترقی کے مواقع نہ ہونا
ملازمت سے وابستگی کم ہونا
2. اخلاقی پیچیدگیاں
اگر آپ کی ملازمت آپ سے ذاتی اقدار پر سمجھوتہ کرنے یا غیر اخلاقی کاموں میں ملوث ہونے کا تقاضا کرتی ہے تو اسے فوری چھوڑ دینا بہتر ہو سکتا ہے۔
ایسے حالات آپ کے ذہنی سکون، عزت نفس اور پیشہ ورانہ ساکھ پر منفی اثر ڈال سکتے ہیں، اگر کام کے دوران آپ کو مسلسل ذہنی دباؤ یا اضطراب کا سامنا کرنا پڑ رہا ہو، تو یہ واضح اشارہ ہے کہ آپ کو اپنی ملازمت پر دوبارہ غور کرنا چاہیے۔
3. ذہنی صحت کا نقصان
اگر آپ کی ملازمت آپ کی ذہنی صحت کو متاثر کر رہی ہے تو یہ خطرے کی گھنٹی ہے۔ مسلسل تناؤ اور پریشانی جسمانی اور ذہنی مسائل کو جنم دے سکتے ہیں، جن میں نیند کی کمی، سر درد، اور تھکن شامل ہیں۔
اپنی ملازمت کو چھوڑنا ہر کسی کیلیے آسان فیصلہ نہیں ہوتا، خاص طور پر اس صورتحال میں جب آپ مالی دباؤ میں ہوں لیکن اگر ممکن ہو تو ایسی ملازمت سے الگ ہو جائیں جو آپ کی زندگی کے اہم معاملات پر برے اثرات مرتب کر رہی ہو۔
4. کام میں عدم دلچسپی اور تحریک کا فقدان
اگر آپ اپنے کام میں دلچسپی نہیں رکھتے اور آپ کو متحرک رہنے میں دقت ہو رہی ہے، تو یہ وقت ہے کہ آپ اپنی موجودہ صورتحال پر نظر ثانی کریں۔ مسلسل بوریت اور ناامیدی آپ کی ذہنی صحت، کارکردگی اور ذاتی اطمینان پر منفی اثر ڈال سکتے ہیں۔
5. ذہنی تناؤ اور کام کا ماحول
ذہنی تناؤ کے ماحول میں کام کرنا نہ صرف آپ کی پیشہ ورانہ زندگی بلکہ ذاتی زندگی پر بھی منفی اثر ڈال سکتا ہے۔ اگر دفتر میں جانا جنگ کے میدان میں جانے جیسا لگتا ہے تو آپ کو اس جگہ سے جتنا جلدی ممکن ہو دور ہوجانا چاہیے۔
اہم اشارے:
دفاتر کی سیاست اور سازشیں
ساتھیوں یا افسران کا غیر حمایتی رویہ
غیر حقیقی توقعات یا کام کے دباؤ کی زیادتی
اپنے مالی حالات پر غور کریں۔
مالی حالات کے پیش نظر ملازمت چھوڑنا ایک بڑا اور اہم فیصلہ ہوتا ہے، اپنی ضروریات کو مدنظر رکھتے ہوئے 3 سے 6 ماہ کے اخراجات کے لیے بچت کرلیں تاکہ آپ بلا خوف آگے بڑھ سکیں۔
یاد رکھیں ! ملازمت چھوڑنے کا فیصلہ مشکل ہوتا ہے، لیکن کبھی کبھی یہ آپ کی زندگی میں آگے بڑھنے کا واحد راستہ بھی ہوسکتا ہے۔ اگر آپ کو ترقی کے مواقع نہ مل رہے ہوں، یا کام آپ کی جذباتی و ذہنی صحت پر برا اثر ڈال رہا ہو، تو یہ وقت ہو سکتا ہے کہ آپ اپنے لیے ایک نئی راہ کا انتخاب کریں۔
اگر آپ کو کسی قسم کی مدد کی ضرورت ہو تو کسی ماہر نفسیات سے مشورہ یا کیریئر کوچ سے رابطہ کرکے اپنے مستقبل کیلئے بہتر فیصلہ کرسکتے ہیں۔
