نئی دہلی: بھارت میں 5 منزلہ عمارت گر گئی جس کے نتیجے میں 15 افراد زخمی ہوئے جبکہ 70 افراد کے ملبے تلے دبنے کا خدشہ ظاہر کیا جارہا ہے۔
بھارتی میڈیا رپورٹس کے مطابق ریاست مہاراشٹرا کے ضلع رائے گڑھ میں 5 منزلہ عمارت منہدم ہونے سے 15 افراد زخمی ہوگئے جبکہ 70 افراد کے ملبے میں پھنسے ہونے کا خدشہ ظاہر کیا جارہا ہے، زخمی افراد کو طبی امداد کے لیے اسپتال منتقل کردیا گیا۔
بھارتی حکام کے مطابق جائے حادثہ پر امدادی کارروائیوں کا آغاز کردیا گیا ہے اور ابھی تک کسی جانی نقصان کی اطلاع نہیں ملی ہے۔
مقامی افراد کے مطابق تقریباً شام 6 بجے عمارت منہدم ہوئی، 15 افراد کو ریسکیو کرلیا گیا ہے، رپورٹ کے مطابق این ڈی آر ایف کی تین ٹیموں کو پونے سے جائے حادثہ پر روانہ کردیا گیا ہے۔
بھارتی میڈیا کے مطابق 5 منزلہ عمارت کو 10 سال قبل تعمیر کیا گیا تھا جس میں 40 اپارٹمنٹس تھے۔
رائے گڑھ کے کلکٹر ندھی چوہدری نے بتایا کہ پہلی تین منزلیں گرنے کے بعد عمارت سے تین لوگ محفوظ باہر نکلنے میں کامیاب ہوئے، ابھی تک کل 15 لوگوں کو محفوظ نکالا گیا ہے جبکہ تمام زخمیوں کو سرکاری اسپتال میں طبی امداد کی فراہمی جاری ہے۔
