عراق کے شہر کوفہ میں 50 سالہ شخص عاقل فخر الدین کو پالتو شیر نے خریدنے کے چند دن بعد ہی مار ڈالا۔
غیرملکی میڈیا رپورٹ کے مطابق شیر نے گھر کے باغیچے میں مالک پر حملہ کیا، شہری نے شیروں اور دیگر جنگلی جانوروں کو پال رکھا تھا اور رواں ماہ کے شروع میں ایک اور شیر خریدا تھا۔
شیر نے مالک کی گردن اور سینے پر اس وقت حملہ کیا جب وہ اس کے پنجرے کے قریب پہنچے۔
پڑوسی ان کی چیخیں سننے کے بعد آیا اور شیر کو گولیاں مار کر انہیں بچانے کی کوشش کی لیکن ناکام رہا۔
سوشل میڈیا پر گردش کرنے والی فوٹیج میں شیر کو گھاس پر پڑا ہوا دکھایا گیا ہے جبکہ عقب میں پنجرے بھی نمایاں ہیں۔
عاقل فخر الدین کی لاش کو نجف کے الصدر میڈیکل سٹی اسپتال منتقل کیا گیا جہاں ڈاکٹروں نے ان کی موت کی تصدیق کردی۔
