مانچسٹر ایئرپورٹ گروپ اور نجی ایئرلائن نے حکومت کی جانب سے عائد ہونے والی سفری پابندیوں کے خلاف عدالت جانے کا اعلان کردیا۔
نمائندہ اے آر وائی نیوز کے مطابق مانچسٹر ایئرپورٹ گروپ اور رائن ایئر نے حکومت ٹریول لسٹ کے خلاف قانونی چارہ جوئی کا فیصلہ کرتے ہوئے ٹریفک لائٹ سسٹم کو عدالت میں چلینج کرنے کا اعلان کردیا۔
عدالت میں اس حوالے سے آج درخواست جمع کرائی جائے گی، جس میں ہیلتھ سیکریٹری میٹ ہینکاک اور ٹرانسپورٹ سیکریٹری گرانٹ شاپس کو فریق بنایا گیا ہے۔
درخواست گزاروں نے مؤقف اختیار کیا کہ ’ٹریول ٹریفک لائٹس سسٹم کی شفافیت پر تحفظات ہیں، حکومتی فیصلے کی وجہ سے فضائی انڈسٹری کو بڑا معاشی دھچکا لگا ہے، حکومت نے ہر تین ہفتے کے بعد لسٹ کا جائزہ لینے کا اعلان کیا تھا مگر ایسا نہیں ہوسکا۔
درخواست گزاروں نے مطالبہ کیا کہ حکومت ٹریفک لائٹ سسٹم میں درجہ بندی کا طریقہ کار واضع کرے، وزیر اعظم بورس جانسن درجہ بندی کا سائنسی طریقہ کار وضع کریں کیونکہ حکومت انتہائی کم انفیکشن ریٹ والے ممالک کو بھی گرین لسٹ میں نہیں ڈال رہی۔
ایئرلائن کے ترجمان کا کہنا تھا کہ ’ بہت کم کسیز والے ممالک بدستور امبر لسٹ میں موجود ہیں، برطانیہ کا ٹریفک لائٹ سسٹم شروع سے ہی گھمانے کی پالیسی پر چلایا جارہا ہے‘۔
مقامی میڈیا کے مطابق اس درخواست میں کئی اور فضائی کمپنیاں بھی فریق بن گئیں ہیں، جنہوں نے درخواست گزاروں کی مکمل معاونت کرنے کا اعلان کیا ہے۔
