لاہور: میو اسپتال میں سیکیورٹی گارڈ نے ڈاکٹر بن کر خاتون کا غلط آپریشن کردیا، خاتون کی طبیعت بگڑنے پر گارڈ اور ملازم کو گرفتار کرلیا گیا۔
اے آر وائی نیوز کے مطابق لاہور کے میو اسپتال میں خاتون کا غلط آپریشن کرنے والے سیکیورٹی گارڈ اور ملازم کو گرفتار کرلیا گیا، ایم ایس کا کہنا ہے کہ سیکیورٹی گارڈ کو دو سال قبل اسپتال سے نکال دیا گیا تھا۔
ایم ایس ڈاکٹر افتخار نے بتایا کہ سابق سیکیورٹی گارڈ نے تھیٹر اٹینڈنٹ سے مل کر خاتون کو بلایا تھا، گارڈ نے پیسوں کی لالچ میں مریضہ کا زخم خراب کیا۔
میو اسپتال کے ایم ایس کے مطابق 17 مئی کو ایمرجنسی میں خاتون کو کمر میں زخم کے علاج کے لیے لایا گیا تھا، گارڈ ڈاکٹر بن کر خاتون کے لواحقین سے ملا اور آپریشن پر راضی کیا، آپریشن کے بعد گھر میں پٹی کرنے کی اجرت 500 روپے مقرر کی گئی۔
میو اسپتال انتظامیہ کا کہنا ہے کہ سابق سیکیورٹی گارڈ نے گھر میں جاکر دو پٹیاں کی اور پیسے بھی بٹورے، ملزم کو پولیس کے حوالے کردیا گیا ہے۔
ایم ایس ڈاکٹر افتخار کا کہنا ہے کہ مریضہ کی حالت تشویشناک ہے، طبی امداد جاری ہے۔
