ریاض: سعودی عرب کے شہر دمام کے معروف مال میں نوجوان نے تین سیکیورٹی گارڈز کو حملہ کرکے زخمی کردیا۔
عرب میڈیا کے مطابق دمام کے شاپنگ مال میں سکیورٹی گارڈ نے خاتون اور اس کی بیٹی سے شاپنگ سینٹر میں داخلے سے قبل توکلنا ایپ دکھانے کے لیے کہا تھا۔
موبائل دیکھنے پر پتا چلا کہ توکلنا ایپ کو اپ ڈیٹ کرنا ہوگا، سیکیورٹی گارڈ نے خواتین سے کہا کہ وہ ایپ کو اپ ڈیٹ کریں۔
سیکیورٹی گارڈ نے توکلنا ایپ اپ ڈیٹ کرتے ہی ماں بیٹی کو مال میں داخلے کی اجازت دی تاہم اس واقعے کے دو روز بعد ایک نوجوان شاپنگ مال کے اسی گیٹ پر پہنچا اور اس سیکیورٹی گارڈ کو جس نے خواتین کو روکا تھا زدوکوب کیا اور مال کے اندر چلا گیا۔
رپورٹ کے مطابق سیکیورٹی گارڈز نے سی سی ٹی وی کیمروں کی مدد سے نوجوان کو نشاندہی کرکے روکا تاہم اس نے موقع پر موجود تین سیکیورٹی گارڈز کو بھی زدوکوب کیا اور ان پر چھری سے حملہ کردیا۔
پولیس نے حملہ آور نوجوان کو گرفتار کرلیا جبکہ زخمی گارڈ کو علاج کے لیے اسپتال منتقل کردیا گیا ہے، جہاں ایک گارڈ کی حالت نازک بتائی جارہی ہے۔
