لاہور: مسلم لیگ ن کے رہنما اور پنجاب اسمبلی میں قائد حزب اختلاف حمزہ شہباز کو ایف آئی اے نے طلب کرلیا۔
اے آر وائی نیوز کے مطابق مسلم لیگ ن کے رہنما حمزہ شہباز کو رمضان شوگر ملز کیس کی تحقیقات کے لیے 24 جون کو طلب کیا گیا ہے۔
ذرائع کے مطابق حمزہ شہباز کو رمضان شوگر ملز کے سی ای او کی حیثیت سے طلب کیا گیا، انکوائری میں شامل نہ ہونے پر انہیں گرفتار کیا جاسکتا ہے۔
ایف آئی اے نوٹس کے مطابق حمزہ شہباز رمضان شوگر ملز، شریف فیڈر ملز، شریف پولٹری فارمز اور مدنی ٹریڈنگ کے چیف ایگزیکٹو آفیسر ہیں۔
وہ شریف ڈیری فارمز، شریف ملک پراڈکٹس، رمضان انرجی لمیٹڈ کے ڈائریکٹر اور العربیہ شوگر ملز کے شئیر ہولڈر ہیں۔
ایف آئی اے کا کہنا ہے کہ انکوائری کے لیے پیش نہ ہونے پر حمزہ شہباز کو گرفتار بھی کیا جاسکتا ہے۔
ایف آئی اے حکام کا کہنا ہے کہ حمزہ شہباز اس وقت رمضان شوگر ملز کے سی ای اوز اور ایم این بھی تھے۔
