اسلام آباد: مشیر قومی سلامتی معید یوسف کا کہنا ہے کہ بھارت کی حکومت آر ایس ایس اور فاشسٹ ایجنڈے پر عمل پیرا ہے، بھارت کو پاکستان میں دہشت گردی روکنی ہوگی۔
اے آر وائی نیوز کے مطابق مشیر قومی سلامتی معید یوسف نے بھارتی صحافی کرن تھاپر کو انٹرویو کے دوران کہا کہ مسئلہ کشمیر یو این قرارداوں کے مطابق حل تک بھارت سے بات نہیں ہوسکتی۔
معید یوسف نے کہا کہ جب تک بھارت مقبوضہ کشمیر میں یکطرفہ اقدام واپس نہیں کرتا بات ناممکن ہے، بھارت پر واضح کردیا ہر پاکستانی آخری وقت تک کشمیریوں کے ساتھ ہے۔
انہوں نے کہا کہ بھارت کے خطے میں امن خراب کرنے کے لیے تخریب کاری کے ثبوت موجود ہیں، لاہور دھماکے کے تانے بانے بھارت سے جڑتے ہیں، ثبوت سامنے رکھ دئیے ہیں۔
مشیر قومی سلامتی نے کہا کہ پاکستان ہمیشہ امن کے لیے کوشاں رہا مگر بھارت کی ہندو توا سوچ آڑے آرہی ہے، بھارتی وزیر خارجہ نے مانا ایف اے ٹی ایف سیاسی عزائم کے لیے استعمال کیا، پاکستان افغانستان کے سئلے کے سیاسی حل کے لے کوشش کرتا رہے گا۔
معید یوسف نے کہا کہ بھارت نے افغانستان کو پاکستان کیخلاف دہشت گردی کا گڑھ بنا رکھا ہے، سوال ہے کیا مودی ہندوتوا حکومت سے مہذب رویے کی امید کی جاسکتی ہے، کیا وجہ ہے بھارت میں مودی کو ہٹلر سے تشبیہ دی جارہی ہے۔
معید یوسف کے سوالات کا بھارتی صحافی کرن تھاپر کے پاس کوئی جواب نہ تھا، معید یوسف نے بھارت میں کورونا صورتحال پر افسوس کا اظہار کیا اور کرن تھاپر کو پاکستان آنے کی دعوت بھی دی۔
