The news is by your side.

Advertisement

مینار پاکستان واقعہ: بزرگ شہری کو گرفتار کرنے کی ویڈیو منظرعام پر آگئی

لاہور: جشن آزادی کے روز مینار پاکستان پر خاتون عائشہ اکرم کے ساتھ بدسلوکی کے واقعے میں پولیس کی جانب 71 سالہ بزرگ شہری کو گرفتار کرنے کی ویڈیو منظرعام پر آگئی۔

اے آر وائی نیوز کے مطابق مینار پاکستان پر خاتون کے ساتھ پیش آئے بدسلوکی کے واقعے پر پولیس کی بے حسی کی دو سی سی ٹی وی فوٹیجز منظر عام پر آگئیں۔

فوٹیج میں دیکھا جاسکتا ہے کہ 71 سالہ بزرگ وزیر خان کو شاہدرہ میں‌ گھر کے باہر سے اٹھایا گیا، انویسٹی گیشن شاہدرہ پولیس نے بزرگ کو موٹر سائیکل پر بٹھایا۔

گزشتہ شام 5 بجکر 35 منٹ پر بزرگ شخص کو پولیس نے اٹھایا، دوسری فوٹیج میں 14 اگست کو وزیر خان کی گھر کے باہر موجودگی ثابت ہوگئی۔

ویڈیو میں 14 اگست کو شام 7 بجکر 10 منٹ پر بزرگ شہری وزیر خان کو گھر کے باہر دیکھا جاسکتا ہے انہیں شاہدرہ سے گرفتار کرکے تھانہ سی آئی اے کوتوالی میں بند کردیا گیا۔

واضح رہے کہ بزرگ شہری کے بیٹے شیر خان نے اے آر وائی نیوز سے گفتگو کرتے ہوئے کہا تھا کہ والد شام کو روزانہ دکان کے باہر بیٹھتے ہیں پولیس اہلکار انہیں یہاں سے ہی اٹھا کر لے گئے اور ابھی تک لاک اپ کیا ہوا ہے۔

بزرگ شہری کے بیٹے نے والد کی رہائی کا مطالبہ کرتے ہوئے کہا کہ وہ بیمار ہیں، 71 سال کی عمر میں ایسا الزام افسوسناک ہے۔

ان کا کہنا تھا کہ لڑکی پر جو ظلم ہوا اس پر ہم بھی افسوس کرتے ہیں جنہوں نے یہ کیا غلط کیا لیکن عزت دار لوگوں کو تنگ نہ کیا جائے۔

Comments

یہ بھی پڑھیں