قندھار: آئی جی پولیس قندھار کا کہنا ہے کہ قندھار میں ہمارے آنے کے بعد جرائم میں 95 فیصد کمی آئی ہے۔
اے آر وائی نیوز کے اینکر ارشد شریف سے خصوصی گفتگو کرتے ہوئے آئی جی پولیس قندھار نے کہا کہ ہمارے پاس 3 ہزار سے زائد پولیس اہلکار موجود ہیں، اہلکاروں کو بینک کے ذریعے تنخواہیں دے رہے ہیں۔
آئی جی قندھار نے کہا کہ ہمارے انٹیلی جنس ادارے کام کررہے ہیں، میڈیا کے ذریعے نمبرز کی تشہیر کی ہے عوام کی شکایت پر رابطہ کریں۔
انہوں نے کہا کہ صوبے سے تمام بڑے جرائم کا خاتمہ ہوچکا ہے، معمولی واقعات کی شکایت ہے۔
آئی جی قندھار کا کہنا ہے کہ پولیس میں کام کرنے والے تمام اہلکاروں کو عہدوں پر واپس آنے کا کہا ہے، اسلامی شرعی اور شوریٰ نظام کے ذریعے پولیس کام کررہی ہے۔
ARY News Senior Anchor @arsched speaks to IG Kandahar on law and order situation in Afghan city#ARYNews #Kandhar #Afghanistan pic.twitter.com/sqJG4FW6xV
— ARY News (@ARYNEWSOFFICIAL) September 10, 2021
مزید پڑھیں: افغانستان میں انسانی بحران افغان شہریوں ، خطے اور دنیا کے مفاد میں نہیں، وزیر خارجہ
واضح رہے کہ اس سے قبل وزیر خارجہ شاہ محمود قریشی کا کہنا تھا کہ عالمی برادری کو افغانستان میں معاشی بہتری کیلئے کردار ادا کرنا چاہیے کیونکہ افغانستان میں معاشی بحران کسی کے حق میں نہیں۔
اسلام آباد میں وزیرخارجہ شاہ محمود قریشی نے اسپین کے ہم منصب کے ہمراہ پریس کانفرنس کرتے ہوئے کہا تھا کہ اسپین کے وزیرخارجہ سے افغانستان کی صورتحال پرتبادلہ خیال ہوا۔
افغانستان کی صورتحال پر وزیر خارجہ کا کہنا تھا کہ افغانستان میں پائیدار امن خطے کے مفاد میں ہے، عالمی برادری کو افغانستان میں معاشی بہتری کیلئے کردارادا کرنا چاہیے کیونکہ افغانستان میں معاشی بحران کسی کے حق میں نہیں۔
