لاہور: پاکستان کرکٹ بورڈ (پی سی بی) کے ڈائریکٹر کمرشل بابر حامد مستعفی ہوگئے۔
اے آر وائی نیوز کے مطابق ذرائع کا کہنا ہے کہ پی سی بی کے ڈائریکٹر کمرشل بابر حامد نے استعفیٰ چیئرمین پی سی بی رمیز راجہ کو بھجوادیا۔
ذرائع پی سی بی کا کہنا ہے کہ نیوزی لینڈ سیریز میں ڈی آر ایس کی غفلت پر رمیز راجہ نے غصے کا اظہار کیا تھا، ڈی آر ایس انکوائری سے پہلے ڈائریکٹر کمرشل بابر حامد مستعفی ہوگئے۔
ذرائع کا بتانا ہے کہ بابر حامد گزشتہ کئی دنوں سے آفس نہیں آرہے تھے تاہم پی سی بی کی جانب سے استعفیٰ کی تصدیق یا تردید نہیں کی گئی ہے۔
واضح رہے کہ بابر حامد کی تقرری سابق چیئرمین احسان مانی نے جون 2019 میں کی تھی۔
مزید پڑھیں: پی سی بی نے سلمان نصیر کو بڑا عہدہ دے دیا
یاد رہے کہ گزشتہ روز چیئرمین پاکستان کرکٹ بورڈ رمیز راجہ نے سلمان نصیر کو پی سی بی کا عبوری چیف ایگزیکٹیو مقرر کیا تھا۔
ذرائع کا کہنا تھا کہ عبوری چیف ایگزیکٹیو کی تقرری پی سی بی آئین کی دفعہ آٹھ اعشاریہ چھ کے تحت کی گئی، سلمان نصیر پہلے ہی پی سی بی چیف آپریٹنگ آفیسر کےعہدے پر فائز ہیں۔
نئے چیف ایگزیکٹیو کی تقرری اشتہار کے بعد کی جائے گی، سلمان نصیر ان دنوں رمیز راجہ کے ہمراہ کراچی کے دورے پر موجود ہیں اور کرکٹ کی بہتری کےلیے مختلف شخصیات سے ملاقاتیں کررہے ہیں۔
