لاہور میں شہید کانسٹیبل عمران کی کمسن بیٹی نے اسکول کے پہلے روز بابا کے ساتھ جانے کی ضد کی تو ایس پی کینٹ لاہور بچی کے گھر پہنچ گئے۔
اے آر وائی نیوز کے مطابق لاہور میں کچھ عرصہ قبل کانسٹیبل عمران شہید ہوئے تھے، شہید کی چار سالہ بیٹی عروہ نور نے اسکول کے پہلے دن بابا کے ساتھ جانے کی ضد کی تو ایس پی کینٹ نے بچی کی خواہش پوری کرتے ہوئے احسن اقدام اٹھایا۔
ایس پی کینٹ آپریشن عیسیٰ سکھیرا بچی عروہ نور کے گھر پہنچے اور سرکاری پروٹوکول میں بچی کو اسکول چھوڑ کر آئے۔
ویڈیو میں دیکھا جاسکتا ہے کہ ایس پی کینٹ نے سرکاری پروٹوکول میں بچی کو اسکول پہنچایا اور عروہ نور کو کلاس روم تک لے کر گئے تو اسکول انتظامیہ، اساتذہ اور بچوں نے عروہ کا بھرپور استقبال کیا۔
ایس پی کینٹ کا کہنا تھا کہ بچی کے اسکول کا پہلا دن تھا، میں خود ان کے والد کی جگہ فیملی کو سپورٹ کرتے ہوئے بچی کو اسکول لے کر آیا ہوں تاکہ عروہ کو والد کی کمی محسوس نہ ہو۔
شہید کانسٹیبل کی والدہ بھی بیٹے کو یاد کرتے ہوئے آبدیدہ ہوگئیں، انہوں نے پوتی کو پیار کرتے ہوئے کہا کہ بیٹے کی شہادت پر فخر ہے۔
کانسٹیبل عمران کی بیوہ دعا گو ہیں کہ ملک کی خدمت کے لیے بچے بھی والد کے نقش قدم پر چلیں گے۔
